Guvernatori i Bankës së Shqipërisë, z. Gent Sejko, zhvilloi një takim me ekipin e Bloomberg News* të kryesuar nga Shefi i zyrës së tij në Varshavë, njëkohësisht dhe Team Leader-i për Evropën Lindore, z. Piotr Skolimowski, dhe zj. Gresa Kraja, reportere pranë Bloomberg.
Fillimisht, Guvernatori Sejko i njohu përfaqësuesit e Bloomberg me zhvillimet kryesore ekonomike dhe financiare në vend. Ai u shpreh se veprimtaria e sektorit financiar është rritur në mënyrë të qëndrueshme; zhvillimet ekonomike kanë qenë pozitive, të ndikuara nga ecuria e mirë e konsumit dhe investimeve, si dhe performanca e fortë e sektorit të turizmit. Guvernatori shtoi se politika monetare e kujdesshme dhe konsistente e ndjekur nga Banka e Shqipërisë, ka pasur një kontribut pozitiv në këto zhvillime. Ajo ka mundësuar kthimin e inflacionit pranë objektivit, pa dëmtuar trendin pozitiv të rritjes ekonomike dhe stabilitetin financiar, si dhe ka gjeneruar një ambient financiar të qetë, me kushte të favorshme financiare dhe kreditim në rritje. Presionet inflacioniste kanë ardhur në rënie, ndaj Banka e Shqipërisë ka lehtësuar politikën e saj monetare.
Lidhur me perspektivën ekonomike, Guvernatori theksoi se ajo mbetet pozitive. Rritja e ekonomisë pritet të mbetet e qëndrueshme dhe inflacioni parashikohet të kthehet në objektivin 3% gjatë vitit 2025. Kjo ecuri do të ndihmohet nga stabilizimi i çmimeve në tregjet ndërkombëtare dhe nga një ecuri më e qëndrueshme e kursit të këmbimit. Megjithatë, vazhdimi i tensioneve gjeopolitike dhe pasiguria në lidhje me politikat tregtare dhe ekonomike, mund të kenë implikime të rëndësishme për ekonominë globale në përgjithësi dhe atë evropiane në veçanti.
Guvernatori i vlerësoi përfaqësuesit e Bloomberg për punën e tyre në përcjelljen e kujdesshme dhe të përgjegjshme të lajmeve që lidhen me ekonominë dhe sistemin financiar. Ai vuri në dukje se falë profesionalizmit të gazetarëve është rritur ndjeshëm cilësia dhe analiza e lajmit ekonomik. Mediat kanë përcjellë me transparencë dhe vërtetësi vendimmarrjen e Bankës së Shqipërisë në fushën e politikës monetare dhe në atë të stabilitetit financiar, duke ndihmuar kështu në përmbushjen e objektivave të saj.
Përfaqësuesit e Bloomberg u shprehën se ata i kushtojnë një rëndësi të veçantë të dhënave ekonomike dhe nënvizuan se bankat qendrore janë kontribuuese të pa zëvendësueshme për funksionimin e ekonomive moderne. Institucionet financiare ofrojnë shërbime thelbësore për administrimin e kursimeve dhe kreditimin e individëve e të bizneseve, si dhe u ofrojnë atyre produkte investimi që i ndihmojnë të planifikojnë dhe ndërtojnë një të ardhme më të mirë.
*Bloomberg është një kompani globale që ofron shërbime financiare dhe informacion në kohë reale, duke përfshirë lajme ekonomike, analiza financiare, të dhëna për tregjet, si dhe mjete të nevojshme për menaxhimin e investimeve. Ajo përdoret nga profesionistët e financave për të analizuar të dhënat e tregjeve dhe për të marrë vendime investimi. Bloomberg menaxhon një portal lajmesh (bloomberg.com), me lajme dhe analiza për ekonominë, biznesin, politikën, dhe industrinë e financave, dhe ofron shërbim të produkteve mediatike dhe teknologjike. Ai përbën një nga burimet më të rëndësishme të informacionit dhe analitikës financiare për profesionistët globalë.
Burimi: Banka e Shqipërisë
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
