Kompania e sigurimeve Eurosig tashmë zotëron pjesën më të madhe të aksioneve në Bankën e Bashkuar të Shqipërisë, 51.02 % të kapitalit të saj, falë iniciativës së Presidentit të Grupit Eurosig-Insig, z. Kadri Morinaj. Pas blerjes nga Eurosig, UBA Bank bëhet banka e pestë me kapital shqiptar.
Në korrik 2021 Eurosig pagoi për blerjen e aksioneve shtesë të Uba Bank, bazuar në marrëveshjen e blerjes nga aksionari IDB (Banka Islamike për Zhvillim).
Pas kësaj blerje kapitali i Bankës së Bashkuar të Shqipërisë (UBA) zotërohet 51% nga aksionerë vendas.
Deri në fund të vitit 2020 Eurosig zotëronte 21.02 të kapitalit të Bankës së Bashkuar të Shqipërisë (UBA), duke u bërë aksionari i dytë më i madh pas Bankës Islamike për Zhvillim, e cila kontrollonte 72.2% të kapitalit të bankës.
Pjesa e mbetur e aksioneve të kapitalit zotërohet nga Ithmaar Bank nga Bahreini dhe disa aksionerë të vegjël individualë, kryesisht nga Arabia Saudite. Eurosig hyri në UBA Bank në gusht të vitit 2019, duke blerë 9 % të aksioneve nga Banka Islamike për Zhvillim (IDB), për mbi 1 milion USD.
Në vijim Eurosig nënshkroi pjesën dërrmuese të rritjes së kapitalit të bankës, të kërkuar nga Banka e Shqipërisë për 984 mijë USD të tjerë, duke e rritur pjesëmarrjen e kuotave të kapitalit bankar në 15.32 %.
Më pas bleu edhe 1.36 % të aksioneve, të zotëruara nga kompania malajziane Business Focus SDN, për rreth 169 mijë USD.
Investimi i Eurosig në UBA Bank deri në fundvitin 2020 arriti në 2.7 milionë USD dhe qëllimi i Presidentit Kadri Morinaj është marrja gradualisht nën kontroll e UBA Bank. Banka Islamike për Zhvillim nuk ka ambicie të mëdha për t’u rritur në tregun shqiptar dhe ka zgjedhur t’ia lërë gradualisht stafetën Eurosig.
Eurosig ka qenë një ndër subjektet më të interesuar për të përfituar nga epoka e shitjeve me çmime të favorshme në sektorin bankar.
Në 2018 Eurosig solli ofertën më të lartë në garën e blerjes së bankës NBG, por më pas u tërhoq nga gara. Objektivi i biznesmenit Kadri Morinaj për të hyrë në tregun bankar po realizohet te UBA Bank.
Lexo: Grupi Eurosig mbështet Ukrainën me 50 mijë euro
Banka e Bashkuar e Shqipërisë është themeluar që në vitin 1993 dhe ushtron aktivitetin, duke u bazuar në parimet e bankingut islamik.
Artikulli u publikua më parë në faqen 17 të numrit 29 të revistës Business Magazine Albania. Business Magazine Albania është revista e parë digjitale me përmbajtje origjinale në shqip të orientuar nga fusha e biznesit. Ju mund të abonoheni Këtu për nr. 29 të saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
