Partia Laburiste në Zelandën e Re, nën udhëheqjen e kryeministres Jacinda Ardern, e cila fitoi zgjedhjet më 17 tetor, për ministre të Jashtme emëroi një politikane, pjesëtare e indigjenëve të popullit Maori. Sipas mediave lokale, Nanaia Mahuta e cila në qeverinë e mëparshme të koalicionit ishte ministrja e Shtetit për Autoritetet Lokale dhe Zhvillimin e Popullit Maori, u bë kryediplomatja e parë e vendit nga ky popull.
Ardern dhe Partia e saj Laburiste në zgjedhje fitoi 49% të votave, duke siguruar 64 vende në Parlamentin prej 120 vendesh, ndërsa prej vitit 1996 për herë të parë në vend është hapur rruga për qeverisjen e një partie të vetme në pushtet. Mahuta, kur u zgjodh në vitin 1996 në Parlament ishte gruaja e parë deputete nga populli indigjen. Ajo përfaqëson rajonin Te Tai Hauauru ku jeton populli Maori. Mahuta, 50 vjeç, u zgjodh për të zëvendësuar Winston Peters, i cili humbi vendin e tij në parlament pas zgjedhjeve të 17 Tetorit. Kryeministrja Jacinda Ardern vlerësoi Mahuta-n, gruan e parë që drejton Ministrinë e Jashtme, si ‘dikush që ndërton marrëdhënie fantastike shumë, shumë shpejt’. Mahuta tha se ajo do të vazhdojë të ndjekë ‘një axhendë progresive tregtare’, midis përparësive të tjera. “Ajo që dimë më shumë se kurrë më parë nën kontekstin Covid-19 është se një vend i vogël si ne, duhet të zhvillojë marrëdhëniet dhe të qëndrojë e përkushtuar ndaj një sistemi tregtar shumëpalësh.” – u tha ajo gazetarëve.
Mahuta është mbesa e Mbretëreshës Maori të ndjerë, Te Arikinui Te Atairangi Kaahu dhe një i afërm i ngushtë i monarkut aktual Maori, Kingi Tuheitia. Pasi u zgjodh për herë të parë në parlament gati dy dekada më parë, ajo u emërua si ministre e Zhvillimit Maori dhe ministre për Qeverisjen Lokale në 2017.Në mjekrën e saj, paraardhësit e së cilës janë udhëheqësit e popullit Maori, gjendet një tatuazh tradicional i quajtur “Moko kauae”. Afërsisht gjysma e Parlamentit të ri të Zelandës së Re përbëhet nga deputete gra.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
