Një nga simbolet më të njohura të Dubait, hoteli luksoz Burj Al Arab, pritet të mbyllet për herë të parë pas më shumë se 25 vitesh funksionimi, për t’iu nënshtruar një programi restaurimi që do të zgjasë rreth 18 muaj.
I hapur në vitin 1999, hoteli është bërë një ikonë globale jo vetëm për formën e tij të veçantë në trajtë vele, por edhe për luksin ekstrem që e karakterizon. Ambientet e brendshme janë të mbuluara me mermer Statuario, të zbukuruara me kristale Swarovski dhe të pasuruara me rreth 1,790 metra katrorë fletë ari 24 karat. Në total, mbi 86,500 kristale janë vendosur me dorë në strukturën e tij, ndërsa përdoren më shumë se 30 lloje të ndryshme mermeri.
Hoteli me 198 suita është në pronësi të Jumeirah Group dhe konsiderohet një nga adresat më prestigjioze në botë. Restaurimi do të drejtohet nga arkitekti i brendshëm Tristan Auer, i cili ka punuar më parë në projekte të njohura si Hôtel de Crillon dhe Les Bains Douches në Paris. Sipas tij, ndërhyrja do të trajtojë ambientet e brendshme “me të njëjtin kujdes si një vepër arti”, duke ruajtur identitetin unik të hotelit.
Ky zhvillim vjen pak kohë pasi godina u prek nga mbetje të një droni iranian të neutralizuar më 1 mars, një incident që shkaktoi një zjarr të kufizuar në fasadën e jashtme, sipas autoriteteve në Dubai.
CEO i Jumeirah, Thomas B. Meier, e cilësoi hotelin si më shumë se një strukturë arkitekturore: “Burj Al Arab është një simbol i ambicies, mjeshtërisë dhe ekselencës së qëndrueshme. Për 27 vite, kjo pronë ka ofruar shërbim të nivelit botëror dhe ky restaurim shënon një kapitull të ri në historinë e saj.”
Lexo edhe: Meta “rrëmben” një tjetër bashkëthemelues nga Thinking Machines Lab i Mira Muratit
Pse është kaq i famshëm Burj Al Arab?
Në një Dubai që në fund të viteve ’90 ishte ende me ndërtime të ulëta, Burj Al Arab u dallua menjëherë si një strukturë revolucionare. Aq mbresëlënës ishte, sa një gazetar i kohës sugjeroi që hoteli të klasifikohej si “me shtatë yje”, edhe pse kjo nuk është një kategori zyrtare.
Përtej arkitekturës, përvoja brenda hotelit është po aq legjendare. Çdo suitë shoqërohet me shërbim personal “butler”, ndërsa klientët mund të rezervojnë makina luksoze si Rolls-Royce për transport privat. Restorantet e tij janë ndër më ekskluzivet në qytet, përfshirë Al Muntaha dhe Ristorante L’Olivo at Al Mahara, ky i fundit i vendosur rreth një akuariumi gjigant.
Hoteli ka hyrë shpesh në histori edhe për evente spektakolare. Në vitin 2005, tenistët Roger Federer dhe Andre Agassi zhvilluan një ndeshje në helipad-in e tij, 210 metra mbi tokë. Më pas, piloti David Coulthard realizoi manovra me makinë Formula 1 në të njëjtin vend, ndërsa në vitin 2023, piloti Luke Czepiela arriti të ulej me avion në këtë platformë me diametër vetëm 27 metra.
Edhe sot, në një qytet të mbushur me ndërtesa ikonike si Burj Khalifa, Museum of the Future apo Atlantis The Palm, Burj Al Arab mbetet një simbol i pakonkurrueshëm i luksit dhe ambicies së Dubait. Restaurimi i tij pritet ta rikthejë këtë ikonë edhe më të fortë, duke ruajtur trashëgiminë dhe duke e përgatitur për dekadat që vijnë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
