Çdo prind shpreson që fëmija i tij, edhe vite më vonë, të dëshirojë të kalojë kohë me të, të ndajë arritjet dhe vështirësitë dhe të kërkojë këshilla. Kjo afërsi afatgjatë nuk ndërtohet rastësisht, por krijohet që herët, në momentet e vogla të përditshme që i mësojnë fëmijës nëse është e sigurt të jetë vetvetja pranë prindërve.
Studimet në fushën e prindërimit të ndërgjegjshëm tregojnë se marrëdhëniet e forta mes prindërve dhe fëmijëve ndërtohen mbi besim, pranim dhe komunikim të hapur. Ja disa praktika që duhen nisur herët për të ndërtuar një lidhje që zgjat deri në adoleshencë dhe moshë madhore.
1. Tregoni besim
Fëmijët shpesh rriten në përputhje me pritshmëritë që u vendosen. Kur kontrollohen vazhdimisht ose korrigjohen për çdo gjë, ata mund të bëhen të rezervuar ose të fshehtë. Ofrimi i besimit që në fillim krijon një bazë të fortë marrëdhënieje dhe u jep atyre sigurinë se mund të kthehen te prindërit kur situatat bëhen më të vështira.
2. Normalizoni çdo emocion, jo vetëm ato të këndshmet
Që një fëmijë të ndihet i sigurt të flasë edhe në adoleshencë, duhet të mësojë që herët se emocionet e tij janë të pranueshme. Mbyllja e lotëve, frikës apo frustrimit mund t’i bëjë fëmijët të ndalojnë së ndari ndjenjat. Siguria emocionale sot sjell hapje emocionale nesër.
Lexo edhe: Elita nuk fshihet më, pse ekspozimi i pasurisë po trazon shoqërinë
3. Mos tentoni të kontrolloni se kush po bëhen
Shumë fëmijë largohen emocionalisht nga prindërit kur ndihen të mbytur nga pritshmëritë. Liria për të qenë kuriozë, të zhurmshëm apo ndryshe i ndihmon ata të qëndrojnë të lidhur me njerëzit që i lejojnë të jenë vetvetja gjatë rritjes.
4. Pranojini plotësisht, edhe pjesët që nuk i kuptoni
Pranimi nuk do të thotë domosdoshmërisht dakordësi, por përcjell mesazhin se fëmija është i dashur dhe i mirëpritur ashtu siç është. Fëmijët që ndihen të pranuar kanë më pak gjasa të fshehin veten në të ardhmen.
5. Riparoni marrëdhënien kur gaboni
Marrëdhëniet më të forta ndërtohen mbi aftësinë për të pranuar gabimet dhe për t’i ndrequr ato. Marrja e përgjegjësisë nga ana e prindërve u mëson fëmijëve se gabimet nuk e prishin lidhjen, por mund ta forcojnë atë.
6. Dëgjoni më shumë sesa flisni
Kur fëmijët nuk ndihen të dëgjuar, ata priren të mbyllen. Shpesh, kur ndajnë frikë apo pakënaqësi, ata kërkojnë lidhje emocionale, jo zgjidhje të menjëhershme. Dëgjimi i vëmendshëm ndërton urën e komunikimit që do të përdorin edhe më vonë në jetë.
7. Lejojini të mos bien dakord pa ndëshkim
Nëse fëmijët mësojnë se mospajtimi sjell konflikt apo tërheqje të dashurisë, ata do të ndalojnë së qeni të sinqertë. Afërsia e shëndetshme kërkon liri emocionale. Reagimi me kureshtje dhe jo me kontroll i mëson fëmijët se ndershmëria është e sigurt dhe nuk e rrezikon lidhjen me prindërit.
Në thelb, afërsia mes prindit dhe fëmijës ndërtohet mbi sigurinë emocionale. Kur kjo siguri krijohet herët, marrëdhënia ka më shumë gjasa të zgjasë dhe të forcohet me kalimin e viteve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
