Tashmë që suplementet, shufrat proteinike dhe ushqimet “high-protein” janë kthyer në modë, është e rëndësishme të kuptojmë se si mund ta shtojmë proteinën në dietë në mënyrë të shëndetshme, pa humbur lëndët ushqyese të tjera esenciale. Eksperti britanik i ushqyerjes, Dr. Tim Spector, një nga zërat më të besuar në fushën e shkencës ushqimore, na ofron një qasje ndryshe, më realiste dhe gjithëpërfshirëse.
Lexo gjithashtu: Madridi shpallet kryeqyteti i kulinarisë së Europës për vitin 2025
Proteina, e rëndësishme, por jo dhe aq
Proteina është një nga tre makronutrientët bazë (së bashku me yndyrën dhe karbohidratet) dhe i vetmi që na furnizon me aminoacide thelbësore për ndërtimin e muskujve, hormoneve, imunitetit dhe madje edhe për shëndetin e flokëve dhe lëkurës. Por sipas Dr. Spector, shumica e njerëzve në SHBA dhe me shumë gjasa edhe në vende të tjera të zhvilluara marrin dyfishin e proteinës së nevojshme.
“Ajo që na mungon realisht është fibra,” thekson ai. “Ndërsa vrapojmë pas proteinës për të pasur trup perfekt, harrojmë përbërësit që na mbajnë vërtet të shëndetshëm.”
Për të ruajtur ekuilibrin, ja 4 mënyra të thjeshta dhe të shijshme për të shtuar proteinën në dietën tuaj pa humbur fibra, vitamina apo mikronutrientë të vlefshëm:
Fasule, superushqimi i nënvlerësuar
Të lira, të shumëllojshme dhe të pasura me proteina bimore, fasulet janë heronjtë e heshtur të dietës së shëndetshme. Qoftë të zeza, të kuqe, qiqra apo soje, ato janë gjithashtu të pasura me fibra dhe polifenole, të cilat ndihmojnë sistemin tretës dhe luftojnë inflamacionin.
Lexo gjithashtu: Alarm për bujqësinë, Shqipëria një nga importueset më të mëdha të ushqimeve në Europë
Drithërat e plota, më shumë se burim karbohidratesh
Shumë e kanë harruar faktin se drithërat e plota si tërshëra, elbi, quinoa dhe buka integrale përmbajnë sasi të konsiderueshme proteinash. Tërshëra, për shembull, ka pothuajse aq proteina sa vezët!
Zëvendësoni mishin herë pas here
Dr. Spector nuk është kundër mishit, por sugjeron ta konsumojmë me masë. Alternativat bimore si fasulet ofrojnë proteina pa kolesterol dhe me më shumë fibra. Filloni me “një ditë pa mish” në javë dhe eksperimentoni me recetat vegjetariane.
Arrat dhe farat, të vogla por superushqyese
Shpesh shmangen për shkak të përmbajtjes së lartë yndyre, por kjo është një yndyrë e shëndetshme, që ndihmon në funksionin e trurit dhe zemrës. Plus, ato janë të mbushura me vitamina, minerale dhe proteina. Shtoni fara liri apo bajame në kos, sallatë ose tërshërë. Gjalpi i kikirikut pa sheqer apo kripë të shtuar është gjithashtu një opsion i shkëlqyer.
Mos u magjepsni pas etiketës “high-protein”. Shikoni për cilësinë, jo sasinë. Zgjidhni më shumë ushqime bimore, shmangni produktet shumë të përpunuara dhe kujdesuni që dieta juaj të jetë e pasur, e balancuar dhe natyrale.
Sikur ta mendonim më shpesh ushqimin si një aleat dhe jo si një numër kalorish, do të ushqeheshim më mirë dhe do të ndiheshim më të fuqishëm, pa rënë në kurthin e trendeve të rreme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
