Vendimi për të kaluar 3% të ndërtimit për banesa në favor të shtresave në nevojë, është kundërshtuar nga Shoqata e Ndërtuesve të Shqipërisë, Biznes Albania dhe Dhoma e Tregtisë së Tiranës.
Në një deklaratë për median, ata janë shprehur të shqetësuar se neni 19 i ligjit “Për Strehimin Social” detyron ndërtuesit privatë që për ndërtime me sipërfaqe banimi mbi 2.000 metra katrorë, të kalojnë pa shpërblim të paktën 3% të sipërfaqes funksionale ndërtim për nevoja strehimi. Thënë ndryshe, të kalojnë në pronësi të Bashkisë jo më pak se 60 m2 sipërfaqe funksionale banimi.
Ky ndryshim në ligj, duke qenë se ka formën e një takse të re, vjen në kundërshtim me legjislacionin shqiptar, thonë sipërmarrësit.
“Vendosja e një parashikimi të tillë mund të konsiderohet si taksim i dyfishtë, duke qenë se ndërtuesit aktualisht paguajnë taksën e infrastrukturës, një pjesë e të cilës shkon për ndërtimin e banesave sociale”, theksuan ata në deklaratën për shtyp.
Përfaqësues të Shoqatës së Ndërtuesve thanë se, “vendimi është antikushtetues dhe shoqata do të ndërmarrë gjithë hapat ligjorë për ta zhbërë”.
Sipërmarrjet i janë drejtuar Presidentit, ndërsa theksojnë se nuk kanë qënë pjesë e konsultimeve të projektligjit.
“Aq e pa logjikshme është kjo taksë sa nuk ekziston asnjë analizë për përcaktimin e marzhit prej jo më pak se 3% sipërfaqe funksionale për 2000 m2 ndërtim për banim. Nuk ka asnjë metodologji se çfarë do të thotë jo më pak dhe se kush do jetë tavani për abuzimin ndaj ndërtuesve me këtë parashikim ligjor. Mjafton një llogaritje e thjeshtë që të arrihet në përfundimin se me këtë ligj abuzimi merret 25÷30% e fitimit neto që i ngelet ndërtuesit nga ndërtimi i një pallati”, theksuan ata.
Sipërmarrësit paralajmëruan se nuk do të prekin fitimet e tyre, por do të rrisin çmimet për klientët. Në deklaratën e përbashkët, thanë se, “Me justifikimin se po bën politika sociale në favor të njerëzve në nevojë, Qeveria nuk po kupton se në të ardhmen do të rëndojë xhepat e qytetareve të thjeshtë, të cilët si konsumator final do të detyrohen që, ashtu si edhe ne rastet e tjera, të mbartin kostot e këtyre politikave sociale, pasi ështe e qartë se kjo taksë do të rrisë çmimet e pasurive të paluajtshme”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
