Nga Adelina Onuzi -Nëse dikur loja ishte vetëm argëtim, sot është industri. Nëse dikur “mami më tha fik kompjuterin” ishte refren i përditshëm, sot janë prindërit që kërkojnë të kuptojnë si të investojnë që fëmija i tyre të bëhet game developer. Industria globale e lojërave nuk është më thjesht një “trend”, është një realitet ekonomik, kulturor dhe teknologjik që po rritet me shpejtësi. Por çfarë ndodh me Shqipërinë? Sa është ajo pjesë e këtij universi digjital? Kush janë ata që nuk janë mjaftuar me lojën, por po krijojnë lojëra?
Për t’i dhënë përgjigje këtyre pyetjeve, kemi takuar tre personazhe që jo vetëm jetojnë me “gaming”-un, por e kultivojnë atë si profesion, si pasion dhe si potencial të ardhshëm të tregut shqiptar. Lorena Gjana nga “Albanian Gaming Community”, Fatjon Gjata nga “Outerlynx”, dhe Ronaldo Cala, nga “Tikas Studios”, secili me historinë, sfidat, rrëfimet dhe shpresat që lidhen me këtë industri.
Shqipëria po rritet si një hapësirë me potencial të madh për industrinë e gamingut, kryesisht falë talentit dhe pasionit të të rinjve shqiptarë. Megjithatë, sfidat institucionale dhe mungesa e mbështetjes financiare mbeten pengesa kryesore për zhvilluesit vendas. Kjo është ajo që thekson Lorena Gjana:
“Shqipëria ka një potencial real për të ndërtuar një industri të qëndrueshme të gaming, falë një rinie të talentuar, të apasionuar pas teknologjisë dhe krijimtarisë. Interesi për zhvillimin e lojërave është në rritje, por sfidat kryesore mbeten të lidhura me mungesën e edukimit të strukturuar në këtë fushë, mungesën e mbështetjes financiare dhe institucionale, si dhe vështirësitë për të hyrë në tregun ndërkombëtar. Pavarësisht këtyre pengesave, jemi duke parë një gjallërim të komunitetit dhe një dëshirë konkrete për të ndërtuar diçka nga e para.”
Tregu global është i vështirë, por disa studio shqiptare kanë arritur të bëhen emra që dallojnë, duke treguar se Shqipëria mund të ketë zë në industrinë e gaming-ut. Lorena Gjana sjell shembuj konkretë dhe thekson rëndësinë e mbështetjes:
“Po, ka disa zhvillues dhe studio shqiptare që kanë filluar të lënë gjurmët e tyre në tregun ndërkombëtar. Outerlynx është një shembull konkret, me dy lojërat e tyre të lançuara në VR, që kanë tërhequr vëmendjen për cilësinë dhe qasjen inovative. Po ashtu, Tika Studios lançoi në Steam lojën e tyre të parë ‘Carnival of Souls’, një arritje domethënëse për një ekip të ri vendas. Një tjetër aktor aktiv është Unyocorp, e cila ofron shërbime për ndërtimin e videolojërave për klientë ndërkombëtarë. Përveç këtyre, ka gjithashtu shumë profesionistë të pavarur shqiptarë që kontribuojnë në projekte globale si artistë, programues apo dizajnerë lojërash.
Që ky sektor të mbështetet më tej, është thelbësore krijimi i një ekosistemi që ofron edukim të specializuar, financim për zhvillimin e produkteve, promovim të punës lokale dhe ndërtim i urave me industrinë ndërkombëtare. Potenciali është aty ,mungon infrastruktura që ta bëjë të qëndrueshëm.”
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
