Ministria e Bujqësisë ka vendosur të zgjasë afatin për aplikimin në skemat e mbështetjes në bujqësi edhe me një muaj. Një një njoftim për mediat, bëhet e ditur se nga 28 shkurti deri më 28 mars kanë aplikuar 5852 fermerë për 52 masat e investimeve dhe mbështetjes direkte në bujqësi dhe blegtori. “Vihet re një rritje mbi 20% e numrit të aplikuesëve në krahasim me vitet e kaluara, edhe falë thjeshtimit të gjithë burokracisë së nevojshme për të aplikuar”, theksojnë burimet zyrtare.
Nisur nga kërkesa e fermerëve, Ministria e Bujqësisë bën të ditur se, aplikimi për masat e investimeve për përmirësimin e kushteve të sigurisë ushqimore, agroturizmin dhe programin e zhvillimit rural, investimit në fermë etj. do të shtyhet deri në datën 27 prill.
Kjo është një masë për të garantuar të gjithë aplikantët potencialë që kanë shprehur interes për masat e investimeve, të përfundojnë procesin e aplikimit.
Këtë vit, fermerët mund të aplikojnë, sipas ministrisë, me 0 dokumente dhe asnjë kosto në 36 pika asistence në të gjithë vendin kundrejt një dosje prej rreth 13 dokumentash që u është dashur të aplikojnë deri në vitin 2017.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
