Njëmbëdhjetë muaj pas zgjidhjes me marrëveshje të ekskluzivitetit të fluturimeve që ka konçesionari i Rinasit, Ministria e Transportit ka ndryshuar direktivat për një aeroport të ri.
Bëhet fjalë për ngritjen e një piste për avionët në jug të vendit, duke harruar kështu vënien në punë të një aeroporti që është gati si ai i Kukësit.
Transportet kanë vënë në dispozicion një shumë prej 250 mijë dollarësh, për të mundësuar një studim se në cilën zonë të jugut do të ndërtohet ky aeroport.
Një nga alternativat e mundshme është Saranda, duke qenë se ka afër edhe ishullin grek të Korfuzit. Në dokumente kërkohet që të bëhet sa më e plotë llogaritja e fluksit të udhëtarëve në këtë pistë, pasi është element i domosdoshëm për afrimin e kompanive që do ta menaxhojnë atë.
Por këtë vit, edhe nëse studimi bëhet, nuk është buxhetuar asnjë fond për ndërtimin e një aeroporti të ri, duke bërë sërish përgjegjës konçesionarin TIA, kompaninë monopol që ka të drejtat e fluturimeve ndërkombëtare në Shqipëri.
Burime nga Aviacioni Civil, thonë se për Kukësin nuk ka pasur asnjë interes për t’a vënë në operim, kjo për shkak edhe të frikës së fluksit të udhëtarëve. Aeroporti i Kukësit ndodhet në pozitë gjeografike shumë afër me atë të Gjakovës.
Pavarësisht shtyrjes me dy vite të tjera të kontratës me Tirana International Airport, përfituesi i vetëm në këtë marrëveshje rezulton të jetë konçesionari i aeroportit të Rinasit.
Shqipëria vijon të ketë çmimet më të larta të biletave në rajon dhe Europë, për shkak të tarifave të larta që u vë firmave të fluturimit kompania që ka me koncension Rinasin.
Burimi: mapo.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
