Vivjan Myrto: Shqipëria ka potencialin të prodhojë kompaninë e radhës që do të revolucionarizojë teknologjinë

Nga Fatima Gorezi – Vivjan Myrto, themelues dhe investitor i njohur i Hyperplane, ndan me  Business Mag rugëtimin e tij nga Tirana në SHBA, ku sfidat personale dhe pasioni për teknologjinë e formuan si një sipërmarrës global. Duke filluar programimin që në moshën 12-vjeçare dhe u përballuar me një diagnozë tumori në adoleshencë, ai zhvilloi një vizion të qartë për ndikimin dhe shkallëzimin që teknologjia mund të sjellë. Në këtë intervistë, Myrto tregon për lindjen e Hyperplane, strategjitë e tij të investimeve, vizionin për Inteligjencën Artificiale dhe mesazhet për të rinjtë shqiptarë që ëndërrojnë një karrierë ndërkombëtare. Rruga e tij tregon se talenti shqiptar mund të bëhet global kur kombinohet me qëndrueshmëri, inovacion dhe guxim për të sfiduar kufijtë fizikë dhe jo vetëm/

Ju jeni rritur në Tiranë dhe filluat të programonit që në moshën 12-vjeçare. Si ndikoi kjo përvojë e hershme në vizionin tuaj për një karrierë në teknologji dhe sipërmarrje?

Të rriteshe në Shqipërinë post-komuniste, marrja e kompjuterit tim të parë në moshën 10-vjeçare ishte si të merrje në dorë një çelës që do të të ndihmonte të hapje dyert e të shihje gjithë botën. Në një vend që sapo kishte filluar të hapej ndaj botës Perëndimore, interneti ofronte një horizont të pafund. Unë nuk isha thjesht duke konsumuar përmbajtje; fillova t’i mësoja vetes programimin si një mënyrë për të ndërtuar dhe zgjidhur probleme, pa u kufizuar nga kufijtë fizikë.