Mosrealizimi i të ardhurave nga taksat ishte një nga pikat, për të cilat qeveria u kritikua fort vitin e kaluar, jo vetëm nga opozita, por edhe Fondi Monetar Ndërkombëtar.
Por viti i ri duket se ka nisur ndryshe. Të ardhurat nga taksat shënuan rritje të fortë në janar, duke arritur një rekord historik për muajin.
Të dhënat zyrtare nga Ministria e Financave tregojnë se, në muajin e parë të vitit, qeveria mblodhi në buxhet 32.2 miliardë lekë nga taksat dhe burimet e tjera, nga 26.3 miliardë që ishte shifra për të njëtën periudhë të vitit paraardhës.
Rritja është 22 për qind. Shifrat e detajuara tregojnë për performancë të fortë thuajse në të gjitha taksat kryesore. Më konkretisht, të ardhurat nga tatimfitimi u rritën me 3.7 herë; nga 393 milionë lekë që ishin vjet në janar, në 1.47 miliardë lekë këtë vit.
Po kështu, të ardhurat nga akciza gati janë dyfishuar, ndërsa ecuri të fortë pozitive kanë pasur edhe të ardhurat nga tatimi mbi të ardhurat personale.
E vetmja taksë kryesore, të ardhurat e të cilës nuk janë rritur me ritme të forta, është tatimi mbi vlerën e shtuar, nga e cila qeveria ka arkëtuar këtë vit vetëm 200 milionë lekë më shumë.
Por teksa në total të ardhurat janë rritur me ritme dyshifrore, buxheti nuk ka qenë aq dinamik në krahun e shpenzimeve. Në janar qeveria shpenzoi gati 400 milionë lekë më pak se vjet, dhe zëri me ecurinë më të ngadaltë janë investimet, të cilat kanë qenë gati minimale.
Rritja e të ardhurave dhe shpenzimet e përmbajtura, kanë bërë të mundur që në muajin e parë të vitit buxheti të dalë me një suficit prej 9 miliardë lekësh.
Buxheti i këtij viti ka karkater të fortë konsolidues, duke parashikuar deficitin më të ulët buxhetor nga fillimi i tranzicionit, vetëm 2.2 për qind e Prodhimit Kombëtar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
