Taksisti Chris shikon vazhdimisht telefononin e tij për përditësime. “Do të humbasë afro 2500 euro në kriptovaluta”, thotë ai.
Chris e përshkruan veten si një “tregtar të vogël të kriptovalutave nga Austria” dhe është një nga viktimat e shumta te një sulmi kibernetik ndaj exchange e kriptovalutave ‘’Liquid Global’’, javën e kaluar.
Kompania ka këmbëngulur se do t’i paguajë të gjithë konsumatorët që kanë humbur afro 100 milionë dollarë. Por, derisa të marrin paratë prapa, shumë klientë vazhdojnë të jenë të shqetësuar.
“Vetura ime është mbi 20-vjeçare dhe mund të kisha blerë një makinë të re të përdorur me ato para. Nuk është katastrofike, por prapë janë mjaft para për mua. Më duhen së paku një vit për të kursyer ato para”, ka thënë Chris.
Në Indonezi, 27-vjeçarja Dina thotë se është në shok. “Jam shumë e zemëruar me hakerët, dhe e stresuar me veten. Kam rreth 30 mijë dollarë dhe më duhen paratë për të jetuar. Unë jam thjeshtë një amvise që përpiqet të fitojë para nga kriptovalutat”, thotë ajo.
Në anën tjetër, një mjek 42-vjeçar nga Norvegjia thotë se e ka të vështirë të përqendrohet, pasi mund të humbasë një pasuri që e ka parë të rritet gjatë viteve. “Llogaria ime në Liquid ishte 969 mijë euro. Është jashtëzakonisht shqetësuese për mua dhe niveli i stresit tim është në shkallën 8 nga 10. Gjithmonë jam duke menduar për këtë histori”, thotë mjeku.
LEXO: Po sikur Bitcoin të shkojë në zero?
Prindërit në panik
Në Sydney, James e përshkruan stresin që ky sulm i ka shkaktuar prindërve të tij, para se kompania të bllokonte transaksionet. “Nëna dhe babai im kishin një Bitcoin aty, pra rreth 70 mijë dollarë australianë. Janë shumë para për ta. Në fillim nuk ia kishin idenë se çfarë po ndodhte dhe u detyruan të shisnin nga paniku, ndërsa humbën rreth 10 mijë dollarë australianë”, ka thënë James.
Liquid Global ka qenë viktimë e një sulmi kibernetik javën e kaluar, dhe paratë ka pak gjasa të kthehen. Firma japoneze të mërkurën ka deklaruar se po bën një rishikim të fortë të sigurisë dhe dëshiron t’i sigurojë përdoruesit se nuk do të përballen me asnjë humbje për shkak të incidentit.
A janë të sigurta?
Exchange si Liquid janë pjesë jetike e botës në rritje të kriptovalutave. Janë uebfaqe që lejojnë njerëzit të blejnë dhe shesin kriptovaluta si Bitcoin dhe Etherum, dhe njerëzit i lënë valutat aty duke menduar se janë të sigurta.
Mirëpo, siguria e këtyre firmave është e diskutueshme. Më herët këtë muaj, një platformë tjetër e kriptovalutave, Poly Network, është përballur me një sulm kibernetik, dhe ka humbur 610 milionë dollarë nga fondet e klientëve të saj.
Dhjetëra sulme kibernetike kanë ndodhur nëpër platforma të ndryshme që nga viti 2014.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English