Edhe në gjuhën shqipe janë krijuar disa tutoriale video nga të rinj, kryesisht të fokusuar në fushën e teknologjisë, si në programim, siguri etj.
Tutorialet orientojnë, mësojnë, udhëzojnë hap pas hapi një proces apo shpjegojnë një gjuhë programimi të caktuar.
Henry Rroga me projektin e tij sputnik.al, ka krijuar tutoriale video në gjuhën shqipe. Ai ka mbaruar studimet e larta Bachelor në Institutin Kanadez të Teknologjisë për “Software Engineering”. Tutorialet që ai krijon janë kryesisht të fokusuara te gjuhët e programimit, si JavaScript, Python, HTML, CSS, por herë pas here bën dhe video të vlefshme rreth nevojave që njerëzit hasin çdo ditë me pajisjet e tyre.
Videot, Henry i hedh në kanalin e Youtube.
YouTube: https://m.youtube.com/channel/UCTnAXu3hOKJfsBwMSuZsRSQ/
Pse emri Sputnik?
Sputnik ishte sateliti i parë që arriti hapësirën në historinë e njerëzimit dhe solli revolucionin teknologjik hapësinor që njohim në ditët e sotshme.
Albania Cyber Security është komuniteti i të gjithë të apasionuarve pas Sigurisë Kibernetike, një hapësirë shkëmbimi informacioni dhe njohurish, i krijuar nga një grup të rinjsh, të cilët kanë menduar ta sjellin në formën e një portali online. Albanian Cyber Security përbëhet nga një ekip i përbërë nga profesionistë të IT, hakerë, pentesterë, informaticienë dhe entuziastë të Sigurisë Kibernetike.
Pjesë e këtij portali janë dhe tutorialet të lidhura ngushtë me Sigurinë Kibernetike, të cilat kanë qëllime edukimi, që njerëzit të mësojnë se si persona të paautorizuar mund të hyjnë në sistemet e tyre dhe në të dhënat që ata i quanin të sigurta. Dhe duke mësuar se si sistemet e tyre mund të thyhen, ata zbulojnë pikat e dobëta të këtyre sistemeve dhe gjejnë një zgjidhje se si mund t’i mbrojnë ato më mirë. Këto tutoriale i shërbejnë të gjithë personave, të cilët janë ende studentë apo profesionistë në fushën e IT-së, freelancer, por edhe përdoruesve fundorë për të kuptuar se si ata mund të jenë shënjestra çdo ditë nga sulme të ndryshme duke filluar që nga email-i i tyre apo edhe rrjetet sociale, që sot janë bërë një pjesë e pandashme e përditshmërisë së gjithësecilit.
Tutorialet mund t’i gjeni faqen online të Albanian Cyber Security, ku janë të shpjeguara hap pas hapi dhe për personat të cilët kanë nevojë për diçka më tepër mund të viziton kanalin e YouTube.
Lirenti.com është një portal ku mund të mësoni nëpërmjet videove udhëzuese mbi AutoCAD. AutoCAD është një program që përdoret kryesisht për vizatimet teknike, modelime apo design.
YouTube: https://www.youtube.com/channel/UCSocC8Ntvp56Qd8rAsl9vLg
Mësime në shqip është një portal, ku do të gjeni tutorialet e fundit në lidhje me gjuhë të ndryshme programimi, por dhe më gjerë. Tutorialet më të fundit në Java, C#, C++ si dhe për tematika të tjera teknike, ilustrohen me video udhëzuese, për të gjithë ata që duan të mësojnë gjëra të reja.
Kanali në YouTube: https://www.youtube.com/channel/UCfK9LPuI3SiBc8gfv1wr6Zg/
https://www.zbavitje.com/category/tutoriale/
Në Zbavitje.com do të gjeni tutoriale më të thjeshta që kanë lidhje me përditshmërinë tonë, si për shembull në temat: Si përdoret Instagram? Si të instalosh WordPress? Si të hapni një llogari PayPal në Shqipëri?
