Kërcënimet e fundit të ish-Presidentit amerikan Donald Trump për vendosjen e një tarife 50% mbi importet evropiane kanë tronditur tregjet financiare në Europë, duke sjellë humbje të ndjeshme në indekset kryesore.
Indeksi DAX i Gjermanisë mbylli javën me një rënie prej 1.6%, ku ndër më të goditurit rezultuan prodhuesit e automobilave: BMW humbi 3.7%, ndërsa Mercedes-Benz ra me 4%.
Në të njëjtën linjë negative lëvizën edhe bursat e tjera: CAC i Francës ra me 1.65%, ndërsa FTSE MIB i Italisë humbi afro 2% të vlerës së tij.
Bursa e Londrës, ndonëse më e qëndrueshme, nuk i shpëtoi ndikimit: FTSE 100 ra me 0.24% ose 21 pikë, duke shënuar nivelin më të ulët të mbylljes që nga fillimi i javës.
Sipas Kate Leaman, analiste kryesore e tregut në AvaTrade, situata ka ngjallur një valë të re pasigurie mes investitorëve.
“Kërcënimet e Trump për tarifa po rikthejnë frikën për një përshkallëzim të ri të tensioneve tregtare. Ato kujtojnë se rreziqet gjeopolitike mund të riaktivizohen në çdo moment dhe me pasoja të menjëhershme për tregjet,” deklaroi ajo për The Guardian.
Leaman theksoi se përveç tarifës 50% ndaj mallrave evropiane, Trump ka propozuar gjithashtu një taksë 25% mbi iPhone-t që nuk prodhohen në SHBA – një masë që ka ngjallur shqetësim të thellë në Wall Street.
Rënia e aksioneve amerikane me rreth 1% gjatë ditës së premte pasqyron një atmosferë të tensionuar, ku në qendër të reagimit qëndron frika për pasoja të drejtpërdrejta mbi inflacionin, fitimet e korporatave dhe zinxhirët globalë të furnizimit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
