Nga Adelina Onuzi
Data shënon 30 mars, që do të thotë që dita e sotme dhe e nesërmja janë afat i fundit për plotësimin e DIVA, që nënkupton deklarimin e të ardhurave personale për vitin e kaluar. Business Magazine realizoi një intervistë me Edvin Stefani-n, ekspert i çështjeve të taksave, i cili na ndihmon të kuptojmë rëndësinë e këtij procesi dhe mënyrën e plotësimit të DIVA-s në mënyrë të saktë dhe pa penalitete.
Lexo gjithashtu: Shërbim i ri i IdentiTek, karta e identiteti do të merret brenda 3 ditësh
Pse është i rëndësishëm plotësimi i Diva-s?
Rëndësia parësore në plotësimin e deklaratën e tatimit për të ardhurat personale vjen nga detyrimi ligjor. Sipas ligjit çdo shtetas duhet të deklarojë brenda datës 31 mars të gjithë të ardhurat e tij me burim në Republikën e Shqipërisë dhe jashtë saj e të realizuar gjatë vitit kalendarik. Në ndryshim nga perceptimi se tatimi paguhet kur merret paga, ligji përcakton se kjo është vetëm një formë mbledhjeje e tatimit, d.m.th tatimi në burim. Një arsye se pse ligji ka këtë kërkesë është se individi duhet të barazohet me shoqërinë. Kjo është një barazi në kohë ndërkohë që detyrimet janë të ndryshme. Plotësimi i deklaratës në afat shmang penalitete të panevojshme në shuma fikse (3,000 lekë) por edhe të ndryshueshme (kur administrata rivlerëson detyrimin tatimor sipas ligjit për procedurat tatimore).
Një tjetër arsye, ndoshta dytësore për nga rëndësia, është se nëse individi do të krijojë një shoqëri, do t’i kërkohet burimi i të ardhurave. Këto kërkesë vijnë nga institucionet licencuese, monitoruese për pastrimin e parave dhe financimin e terrorizimit, nga ILDKP, etj. Të gjitha institucionet kërkojnë deklaratën e DIVA si një dokument që justifikon origjinën e pasurisë. Bankat kanë filluar gjithashtu të kërkojnë gjithnjë e më shume deklaratën DIVA.
Një jorezident që fiton të ardhura në Shqipëri duhet të bëjë gjithashtu këtë deklaratë. Kjo i siguron atij zbritjen tatimore në juridiksionin e tij.
Lexo gjithashtu: Nga makinat RETRO te Grand Prix, Tirana pret eventin më të madh të automobilizmit
Si të plotësojmë DIVA?
Afati për plotësimin është deri në 31 mars. Ju detyroheni nëse të ardhurat janë nën 1.2 milion lekë ose jeni i dy-punësuar (pavarësisht madhësisë së pagave) si dhe nëse keni krijuar të ardhura në shumën mbi 50,000 lekë gjatë vitit kalendarik për të cilat nuk ju është mbajtur tatimi në burim.
Ju mund ti drejtoheni faqes së tatimeve dhe të ndiqni degëzimin në vijim tatime.gov.al/e-shërbime/për individë. Në ndërfaqen që iu shfaqet përzgjidhni shënimin e nënvizuar klikoni këtu në fjalinë “Nëse jeni një individ privat dhe doni të dorëzoni Deklaratën Individuale Vjetore të të Ardhurave për Individët dhe jeni të regjistruar në eFiling, klikoni këtu.”
Ose në një fjali më poshtë “Nëse jeni një individ privat dhe doni të dorëzoni Deklaratën Individuale Vjetore të të Ardhurave për Individët, por nuk jeni të regjistruar në eFiling, ju mund të regjistroheni duke klikuar këtu”. Rasti i dytë është për ata që e plotësojnë deklaratën për herë të parë. Këtu duhet të plotësohen të dhënat për Numri Personal, Numri i Kartës së Identitetit, Emri, Atësia, Mbiemri, Mëmësia, Data e Lindjes, Zyra Tatimore, Adresa e Postës Elektronike (e-mail), Numri i Telefonit, si dhe të plotësoni një passẇord.
Në vijim ju mund të aksesoni llogarinë duke vendosur numrin personal që gjendet ne letërnjoftim ose pasaportë. Shtoni passẇordin.
Me të hyrë në ‘brendësi’ të faqes së tatimeve ju duhet të bëni aktivizimin e deklaratës. Sistemi është projektuar në mënyrë të tillë duke pasur parasysh se ju mund të mos detyroheni të bëni deklaratë në ndonjë vit. Aktivitimi bëhet në ikonë lartë në të majtë të ekranit; konkretisht në Deklarata/Deklarata të padorëzuara. Në këtë moment duhet të bëhet krijimi i deklaratës në ikonën Krijo Deklaratë. Në tabelën Create Retur Sheet, për vitin 2024 përzgjidhet 24-A. Me të bërë këtë veprim ju është gjenerura deklarata. Nga ky momenti ju duhet të bëni deklaratë pasi ju gjenerohet gjoba për mosdeklarim.
Shfaqet deklarata. Ë këtë deklaratë duhet të bëhet plotësimi i të dhënave. Niset me të dhënat për adresën, nr. e telefonit, etj., të dhëna jofinanciare. Në vijim shtohen të dhënat financiare. Kujdes pagat nuk kanë nevojë të shtohen; sistemi i njeh paraprakisht ato. Zakonisht shtohen qiratë e marra, fitimet nga shitja e ndonjë apartamenti, fitimet nga lojërat e fatit, etj. Në vijim ju duhet të deklaroni tatimin e mbajtur në burim gjatë vitit për këto të ardhura që ju i shtoni në deklaratë. Kjo redukton detyrimin për tu paguar në deklaratë.
Në fund të deklaratës ndodhen tre ikona; Kontrolloni saktësinë e deklaratës, Ruaj dhe Dorëzo. Sugjerohet përdorimi i shpeshtë i ikonës Kontrolloni saktësinë e deklaratës. Në rast pasaktësie ju informoheni në pjesën lartë të deklaratës me shkronja të kuqe për gabimet e mundshme. Kur nuk ka gabime validimi mund të procedoni me ikonën Ruaj dhe më pas me Dorëzo.
Pas doëzimit ju mund të printoni mandat pagesën. Kjo bëhet duke iu referuar ikonave Deklarata/Deklarata të dorëzuara. Ju shfaqet një liste më deklarata. Përzgjidhni deklaratën me anë të shigjetës dhe klikoni gjenero Mandat pagesën. Ju mund ti drejtoheni bankave të nivelit të dytë me këtë mandat pagese.
A duhet të deklarojë një pensionist DIVA?
Pensionisti duhet të deklarojë diva, por në këtë deklaratë nuk bën pjesë pensioni i marrë. Pensionisti i nënshtrohet të njëjta kufizime sikurse edhe individi aktiv në tregun e punës. Ai duhet të deklarojë për shembull qiranë e përfituar, fitimin kapital nga shitja e një prone të patundshme, fitimet nga lojërat e fatit, të ardhurat e përfituara nga dhurimi prej të tretëve kur kalojnë vlerën 5 milion për pasuritë e paluajtshme dhe 1 milion lekë për pasurinë e luajtshme, etj.
Mos-taksimi i pensioneve të përfituara nga skema e detyrueshme parashikohet në nenin 11, pika a. Por pse ky diferencim ndërmjet pensioneve private (vullnetare) dhe shtetërore? Pse e ardhura nga një pension privat duhet të jenë pjesë e DIVA? Pagesat e bëra gjatë punësimit për të financiar skemën vullnetare të pensioneve janë të zbritshme nga baza e tatueshme me tatim page (neni 20) gjatë punësimit. Në ndryshim, financimet për skemën e detyrueshme nuk janë një shpenzim i zbritshëm, d.m.th nuk reduktojnë tatimin e punësimit. Kjo diferencë duhet të informojë mjaftueshëm mbi trajtimin tatimor të ndryshëm që bëhet në DIVA dhe arsyet e nenit 11, pika a.
Afati i fundit i plotësimit është më 31 mars, ndaj për të gjithë që preken nga ky deklarim, mund të klikojnë këtu për të vazhduar më tej.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
