Kimisti italian Francesco Rivella, themeluesi i të famshmes Nutella, u nda nga jeta në Ditën e Shën Valentinit të këtij viti, në moshën 97-vjeçare, sipas disa raportimeve mediatike. I njohur si “babai” i Nutella, Rivella nisi punën në kompaninë italiane të çokollatave dhe ëmbëlsirave Ferrero në vitin 1952, dy vjet përpara se Nutella të prezantohej në treg.
Në atë kohë, ai ishte vetëm 25 vjeç dhe sapo kishte përfunduar studimet universitare, duke u diplomuar në kimi bromatologjike në Torino. Rivella ishte pjesë e “dhomës së kimisë” në Ferrero, ku punonte me ekipin përgjegjës për studimin e lëndëve të para dhe zhvillimin e produkteve të reja, duke kombinuar, rafinuar dhe testuar përbërësit. Sipas New York Post, disa nga produktet më të njohura të Ferrero u krijuan pikërisht në këtë laborator. Më vonë, Rivella u bë një nga drejtuesit kryesorë të kompanisë, e cila u themelua në vitin 1946 nga Pietro Ferrero. Ai ishte gjithashtu krahu i djathtë i Michele Ferrero, djalit të themeluesit, i cili trashëgoi biznesin familjar. Michele Ferrero ndërroi jetë gjithashtu më 14 shkurt, por në vitin 2015 – saktësisht 10 vjet më parë. Pas daljes në pension, Rivella iu përkushtua bujqësisë dhe sportit tradicional italian pallapugno. Ai la pas tre djem, një vajzë dhe shtatë nipër e mbesa. Ceremonia e tij mortore u mbajt të hënën në Alba, ku ai jetoi pas daljes në pension. Ai do të prehet në Barbaresco, sipas raportimeve.
Historia e Nutella
Origjina e Nutella lidhet me Italinë e pasluftës, kur kakaoja ishte e pakët dhe e vështirë për t’u gjetur. Ferrero, falë punës së Rivella, gjeti një mënyrë për të kapërcyer këtë problem duke krijuar një pastë të ëmbël nga lajthitë, sheqeri dhe një sasi e vogël kakaoje, sipas faqes zyrtare të Nutella. Ky produkt i parë, i krijuar në vitin 1946, u quajt Giandujot, emër i frymëzuar nga Gianduja, një çokollatë me lajthi e njohur në Itali. Fillimisht, Giandujot ishte një pastë e fortë që shitej në formë blloku dhe pritej në feta për t’u lyer mbi bukë. Më vonë, kjo pastë u bë më e butë dhe më e lehtë për t’u përhapur, duke u quajtur SuperCrema. Emri Nutella u prezantua në vitin 1964, kur receta u përmirësua dhe filloi të shitej në kavanoza, me një përzierje të rafinuar lajthie dhe kakaoje.
Ky produkt shumë shpejt u bë i famshëm ndërkombëtarisht dhe sot është kaq i dashur në mbarë botën, saqë që prej vitit 2007, 5 shkurti njihet si Dita Botërore e Nutella.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
