Presidenti amerikan Trump ka autorizuar një pezullim 90-ditor të tarifave tregtare për shumicën e vendeve, duke e përjashtuar Kinën nga kjo vendimarrje e re. Në të njëjtin postim, ai bëri të ditur se tarifat e reja prej 125% ndaj importeve kineze hynë në fuqi menjëherë. Ai e justifikoi këtë masë me “mungesën e respektit që Kina ka treguar ndaj Tregjeve Botërore”.
Fillimisht, Trump sugjeroi se pezullimi 90-ditor do të zbatohej për më shumë se 75 vende që kishin shprehur interes për të negociuar marrëveshje të reja tregtare me Uashingtonin pas njoftimit të paketës së tarifave të njohur si “Dita e Çlirimit”. Megjithatë, Shtëpia e Bardhë sqaroi më vonë se pezullimi do të aplikohej për shumicën, në mos për të gjitha vendet, dhe se një “tarifë universale prej 10%” do të zbatohej përkohësisht gjatë periudhës së negociatave tregtare.
Tregjet globale reaguan menjëherë ndaj lajmit, me indeksin Dow Jones që u rrit me 2,000 pikë brenda pak minutash nga njoftimi.
Lexo edhe : Ndërsa BE-ja goditet, Shqipëria pozicionohet si aleati i vogël i Amerikës së madhe
Pakoja më e fundit e tarifave të Trump hyri në fuqi pak pas mesnatës dhe përfshin një tarifë prej 104% ndaj produkteve nga Kina, 20% ndaj Bashkimit Europian, 24% ndaj Japonisë dhe 25% ndaj Koresë së Jugut. Zyrtarë të administratës amerikane janë përpjekur të qetësojnë votuesit, ligjvënësit republikanë dhe drejtuesit e korporatave duke theksuar se normat e vendosura janë të negociueshme, megjithëse ky proces mund të zgjasë me muaj.
Burimi: Euronews/ Përshtati: Businessmag.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
