P/ligji u hartua nga Drejtoria e Përgjithshme e Patentave dhe Markave (DPPM) me mbështetjen edhe të ekspertëve të organizatave ndërkombëtare të pronësisë intelektuale si: Organizata Botërore e Pronësisë Intelektuale; Zyra Evropiane e Patentave dhe Zyra e Bashkimit Evropian për Pronësinë Intelektuale.
Bazuar në këtë ligj, burimet zyrtare nga Drejtoria e Patentave dhe Markave thanë se do të mundësohet lehtësimi i procedurës së aplikimit për regjistrimin e Patentave mbi Shpikjet, Modeleve të Përdorimit, Markave Tregtare, Disenjove Industriale dhe Treguesve Gjeografikë. Afatet e regjistrimit do të shkurtohen ndjeshëm dhe do të rritet cilësia e ekzaminimit të objekteve të Pronësisë Industriale.
“Tregu i kapitalit intelektual do të marrë jetë dhe do të kthehet në vlerë ekonomike të shtuar për mbajtësit e të drejtave. Parashikohet edhe përdorimi si kolateral i objekteve të regjistruara të Pronësisë Industriale. Asetet jofizike do të marrin vlerë monetare konkrete nëpërmjet shitblerjes së tyre, duke e bërë tregun shqiptar edhe më dinamik”, thanë burimet.
Gjithashtu ky projektligj, për herë të parë plotëson kuadrin ligjor të përshtatshëm për mbrojtjen dhe zhvillimin e Treguesve Gjeografikë dhe Emërtimeve të Origjinës në Shqipëri.
Këto objekte të rëndësishme të Pronësisë Industriale mbrojnë dhe u japin vlerë produkteve agrokulturore, ushqimore apo artizanale të cilat kanë karakteristika që burojnë nga kushtet klimaterike dhe traditat e zonës ku ato prodhohen.
Shqipëria është një vend, i cili në saj të biodiversitetit, traditës dhe trashëgimisë kulturore, ka potencial të fuqishëm për të zhvilluar këto produkete specifike, të cilat konsiderohen si resurse të fuqishme ekonomike.
Mbrojtja nga falsifikimi i këtyre produkteve krijon një treg të sigurt për prodhuesit vendas, si dhe cilësi të garantuar për konsumatorët. Identifikimi dhe regjistrimi i tyre do të nxisë rritjen ekonomike në zonat rurale, si dhe eksportin e produkteve shqiptare në tregun e huaj duke i bërë ato të mirënjohura në botë.
Projektligji parashikon masa konkrete për zbatueshmërinë e tij. Kjo do të arrihet nëpërmjet ristrukturimit të institucionit përgjegjës për sistemin e Pronësisë Industriale në Shqipëri me qëllim forcimin e kapaciteteve administrative dhe financiare të saj.
burimi: ata.gov.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
