Edicioni i parë i Plug and Play Tirana Expo mbylli ditën e djeshme në ambientet e Piramidës maratonën e një eventi 2 ditor, i cili mblodhi përfaqësues të lartë institucionesh, investitorë, startup-e dhe ekspertë ndërkombëtarë të teknologjisë dhe inovacionit. Në fjalën e hapjes, Mitchell Granoff, kreu i AADF, theksoi rëndësinë e këtij momenti për ekosistemin shqiptar të inovacionit: “Plug and Play Tirana është një hap konkret drejt integrimit të Shqipërisë në rrjetin global të sipërmarrjes dhe teknologjisë,” – u shpreh ai. Granoff kujtoi se dikur Shqipëria ishte ndër vendet më të varfëra të rajonit, ndërsa sot po investon në të ardhmen e saj përmes inovacionit. Ai përmendi kontributet e AADF-së si një partner që ka mbështetur vendin që nga projektet bazike të infrastrukturës e arsimit, e deri te Piramida, tashmë një qendër inovacioni përtej kufijve shqiptarë.
Nga ana e tij, Seema Amidi, menaxher i Plug and Play për rajonin EMEA, nënvizoi se Tirana po shndërrohet në një qendër të re të zhvillimit teknologjik në Ballkan.
“Ne besojmë se talenti shqiptar dhe energjia e këtij tregu do të sjellin histori suksesi me ndikim ndërkombëtar,” – theksoi ai.
Fjala e hapjes u përshëndet edhe nga kryetarja në detyrë e Bashkisë së Tiranës, Anuela Ristani, e cila bëri një analogji mes së shkuarës dhe së tashmes: “Në të kaluarën, 16 tetori festohej si ditëlindja e një lideri komunist, ndërsa sot, nga zyrat e Plug and Play, ndjehet energjia e një Shqipërie që po formëson rrugën e saj drejt zhvillimit.”
Ceremonia u pasua nga Uranik Begu, i cili falënderoi të pranishmit dhe ftoi në skenë 22 startup-et fituese të kohortës së parë që morën pjesë në programin 8-mujor të akselerimit.
Pas fjalimeve, programi vijoi me panele mbi transformimin industrial dhe inovacionin rajonal, me pjesëmarrjen e ekspertëve nga ExxonMobil, BNP Paribas dhe startup-e të Ballkanit. Paneli “How Albania Can Become a Regional Innovation Hub” solli ide konkrete për zhvillimin e Tiranës si një qendër rajonale teknologjie.
Në pjesën e dytë të ditës, Arvind Gupta, themelues i Digital India, mbajti një ligjëratë mbi ndikimin e teknologjisë në epokën e inteligjencës artificiale, ndërsa paneli “Breaking Barriers & Making Big Moves” u fokusua te sfidat e grave sipërmarrëse në sektorin e inovacionit.
Mbrëmja u mbyll me fjalimin e Ben Zevenbergen nga Google mbi etikën dhe vlerat njerëzore në zhvillimin e AI-së, e ndjekur nga një aktivitet kulturor shqiptar dhe sesione rrjetëzimi mes investitorëve dhe startup-eve.
Dita e dytë e Plug and Play Tirana Expo vijoi me diskutime mbi teknologjitë e gjelbra dhe inovacionin social. Ekspertët ndanë përvoja mbi ndërtimin e ekipeve, tërheqjen e investimeve dhe mënyrën se si Shqipëria mund të shndërrohet në një qendër rajonale të inovacionit. Programi përfundoi me një sesion interaktiv ku startup-et prezantuan idetë e tyre përpara investitorëve, duke dëshmuar potencialin global të tregut shqiptar.
Në po të njëjtën dite u zhvillua edhe finalja e programit të akselerimit “Plug and Play Tirana Expo 2025”, një ngjarje që shënon një hap të rëndësishëm në zhvillimin e ekosistemit të startup-eve në vend. Dhjetë startup-e shqiptare do të udhëtojnë drejt Silicon Valley për të prezantuar idetë e tyre novatore dhe për të ndërtuar ura bashkëpunimi me partnerë ndërkombëtarë.
Ministrja e Ekonomisë dhe Inovacionit, Delina Ibrahimaj, theksoi rëndësinë e krijimit të një modeli të qëndrueshëm për mbështetjen e sipërmarrjeve të reja, duke vënë në dukje bashkëpunimin ndërkombëtar dhe besimin tek potenciali i të rinjve shqiptarë.
“Shqipëria po ndërton një ekosistem inovacioni që mbështet idetë e reja dhe i lidh ato me tregjet globale,” – u shpreh ministrja.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
