Suela Bala, filantropja që dërgoi bibliotekën në fshatra » Business Magazine Albania – Media Dixhitale dedikuar Sipërmarrjes
Përditësuar së fundmi: 14/02/2020

Suela Bala, filantropja që dërgoi bibliotekën në fshatra

Share
nga Amantia Kullolli
Shk 14, 2020

 

Dashuria për librin dhe nismat që mori në këtë drejtim e kanë futur Suela Balën mes filantropëve shqiptarë. Asaj iu dha këtë vit çmimi i Filantropisë për Individin, nga Partnerët Shqipëri. Motivacioni ishte, “Për mbështetjen e dhënë në zhvillimin dhe promovimin e vlerave edukuese dhe kulturore, e veçanerisht si nismëtare e nismës “Bibkioteka Lëvizëse”, në Lezhë.

Kur nisi punën në Bibliotekën e Lezhës, studioi në fillim shkollat. Nga 40 prej tyre në të gjithë rajonin, vetëm 7 ishin në qytet. Suela Bala e kuptoi se pjesa më e madhe e lexuesve të vegjël nuk kishin akses tek libri. Ndaj vendoset në kërkim të një zgjidhjeje.

Biblioteka e lëvizshme, falë nismës së saj dhe mbështetjes që pati, u bë shpejt shembulli frymëzues. Nga biblioteka shëtitëse, një praktikë unike në Shqipëri, në vetëm dy vite, u lexuan mbi 200 mijë libra, te mbi 2000 fëmijë.

Lexo: Shpallen fituesit e Çmimeve të Filantropisë 2019

Bashkë me kolegët e saj Suela vendos të angazhojë komunitetin, të dhurojë libra për fëmijë. Bashkëpunimi me institucionet kombëtare dhe ndërkombëtare mundëson që biblioteka të shkojë nëpër fshatra. Krahas shfletimit të librit, fëmijët do të miqësoheshin në distancë me dhuruesit e librave, emrat e të cilëve ishin në kopertinë.

Që me shpërndarjet e para Suela shikon etjen e fëmijëve për të lexuar. Mbërritja e librit në fshat ishte një ngjarje për ta.

Me buzëqeshje në fytyrë e dhembshuri në zemër, Suela shijon momentet e hapjes së menjëhershme të librit nga fëmijët në zonat më të izoluara të Lezhës. Kjo nismë e Suelës, mori vëmendje mbarë kombëtare. Ndaj më vonë, Suela bëhet pjesë e lëvizjes kombëtare, “Takim me Librin”.

Një takim që nis në shkolla, qendra për fëmijë, teatro, në ditë jave, por edhe në fundjava.