Produktet e Labbox ofrojnë eksperiencë zbavitëse edukative, të bazuar në planprogram vetjak, i cili i lejon fëmijët të mësojnë për teknologjinë duke kaluar nëpër sfida, të cilat vijnë në formë të Box-ave. Ky është investimi i parë i SCV’s në një startup të bazuar në Kosovë, i cili do të mundësojë prodhimin e parë të produkteve të Labbox në tregun tonë.
Labbox zgjidh një problem shumë të rëndësishëm, i cili prek mënyrën si fëmijët mësojnë për teknologji. Qëllimi i Labbox është që të ndërrojë qasjen ndaj teknologjisë, që nis me frikën nga gabimet, drejtë nxitjes së eksperimentimit. Aq më tepër produkti është i tillë që i mëson dhe inkurajon fëmijët të mësojnë prej gabimeve të tyre. Qasja e re e Labbox sjell mësimin nga tregimet kreative, të cilat nxisin fëmijët të provojnë dhe të gjejnë zgjidhje për sfidat në mënyrë të pavarur, qasje kjo e cila qëllimisht është larguar nga instruksionet ‘hap pas hapi’ të cilat shpesh janë të përdorura.
Për ta bërë teknologjinë dhe konceptet e saj më të kapshme për fëmijët, Labbox ka dizajn harduerik, i cili u jep informacion fëmijëve përmes një gjuhe të ngjyrave, gjuhë kjo e cila i udhëzon gjatë përdorimit të produkteve. Qasja unike ndaj mësimit të implementuar nga Labbox, ka tërhequr vëmendjen e shumë edukatorëve nëpër botë, si dhe është pilotuar në disa shkolla publike në Kosovë.
Kujtojmë që kompania Labbox ka qenë gjithashtu fituese e medaljes së artë në Londër në vitin e kaluar, finalist në SLUSH – njërin nga eventet më të mëdha botërore të startupeve në Helsinki, si dhe është ekip virtualisht i inkubuar në ICK.
Themelueset, motrat Arta dhe Fiona Shehu, kanë filluar Labboxin në 2018 në klasat e Akademisë jCoders. Me ndihmën e ekipit të tyre, si dhe me mbi mijëra orë të testimit të komponentëve të ndryshme dhe planprogrameve me nxënësit e vet, lindi Labbox.
Sot Labbox përbëhet nga një ekip i personave me shkathtësi të theksuara në elektronikë, programim dhe edukatorë të çertifikuar në fushën e Shkencës, Teknologjisë, Inxhinierisë dhe Matematikës (STEM). Ky ekip është i vetmi në rajon që ka fituar certifikimin STEM nga AdvanceEd, agjencia më e madhe e akreditimit në Shtetet e Bashkuara të Amerikës.
“Si e shpenzojnë kohën fëmijët tanë me teknologjinë, e definon edhe qasjen, konceptet e tyre përballë teknologjisë në të ardhmen. Labbox jo vetëm që ofron eksperiencën e nevojshme për të mësuar dhe krijuar në teknologji, por lëviz qasjen nga frika prej gabimeve drejt shfrytëzimit të gabimeve për të mësuar. Kjo mënyrë e të menduarit ndërton një gjeneratë individësh që zgjidhin probleme dhe kanë vetëbesimin që të gjejnë zgjidhje të ndryshme për problemet e kohës sonë”, tha Arta Shehu Zaimi, CEO dhe themeluese e LabBox.
Tatjana Zabasu Mikuž, Partnere në Menaxhim e kompanisë SCV, shton: “Unë jam gjithmonë në kërkim të themeluesve të cilët me inspirojnë, posedojnë njohuri të gjera dhe janë duke i adresuar sfidat e botës së sotme. Është jashtëzakonisht entuziazmuese që të kem mundësi të punoj me një ekip kreativ dhe të aftë, i cili ka për mision të përgatis fëmijët për sfidat e së ardhmes, dhe jam shumë e lumtur që jemi duke dhënë mbështetje në këtë mision”.
Me vendndodhje në Beograd, Zagreb dhe Shkup, South Central Ventures (SCV), përmes Enterprise Innovation Fund (ENIF), është i përqendruar në kompanitë teknologjike të Ballkanit Perëndimor. Fondi 40 milionë euro është i dedikuar fillimisht për startupe në faza fillestare dhe në investime që nxisin rritje. Në xhepin e fondit për investime fillestare, 1,5 milionë euro janë të përcaktuara për investime deri në 100 mijë euro për kompani. Pjesa më e madhe e fondit është e përqendruar për startupet në fazat fillestare dhe në ato në rritje deri në 3 milionë euro për kompani. Këto investime kanë për qëllim të shtyjnë përpara zgjerimet ndërkombëtare të bizneseve dhe rritjen e kompanive më të mira në teknologji, të cilat janë në gjendje të dëshmojnë që kanë potencial për t’u ‘bërë të suksesshme’.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
