Sony ka njoftuar një rritje të ndjeshme të çmimeve për PlayStation 5 në Evropë, Australi dhe Zelandën e Re, duke përmendur tronditjen globale ekonomike si arsye kryesore. Vendimi i publikuar të dielën në blogun zyrtar të PlayStation përfaqëson një “vendim të vështirë”, siç e cilëson kompania, përballë një “klime sfiduese ekonomike, me inflacion të lartë dhe kurs të paqëndrueshëm të këmbimit valutor”. Çmimi i rekomanduar për PS5 Digital Edition në Evropë do të rritet në 499 euro, nga 449 euro që ishte në përditësimin e mëparshëm të vitit 2022. Në Mbretërinë e Bashkuar, çmimi do të arrijë në 430 paund (rreth 498 euro), nga 389 paund (450 euro), ndërsa në Australi, PS5 Digital do të kushtojë 749 dollarë australianë (rreth 415.7 euro), nga 649 më parë. Në Zelandën e Re, çmimi i ri do të jetë 859 dollarë të Zelandës së Re (442.9 euro).
Ndërkohë, çmimi për versionin standard të PS5, që përfshin një disk Blu-ray, dhe modeli PS5 Pro do të mbeten të pandryshuara , të paktën për momentin.
SHBA-ja, tregu që Sony nuk guxon të prekë
Ekspertët vërejnë se vendimi për të mos rritur çmimin në Shtetet e Bashkuara lidhet me rëndësinë e jashtëzakonshme të këtij tregu për të ardhurat e Sony-t. Christopher Dring, kryeredaktor dhe bashkëthemelues i The Game Business, tha për BBC-në: “Në vend që të rrisin çmimin në SHBA, është e mundur që kompani si PlayStation po rrisin çmimet globalisht për të mbrojtur, sa të mundin, tregun amerikan.” Ai shtoi gjithashtu: “Epoka kur videolojërat uleshin në çmim me kalimin e kohës, ka marrë fund.”
Lexo edhe: Trump ngrin 2 miliardë dollarë fonde për Harvard-in
Tregu i videolojërave në tension. Nintendo shtyn Switch 2
Rritja e çmimeve nga Sony vjen në një kohë të trazuar për industrinë e lojërave. Konkurrenti kryesor, Nintendo, ka shtyrë pa afat daljen në treg të Switch 2, për shkak të pasigurisë ekonomike dhe tarifave të reja që po shqetësojnë zinxhirët globalë të prodhimit.
Administrata e Presidentit amerikan Donald Trump ka njoftuar vendosjen e tarifave të reja ndaj shumë vendeve, duke përfshirë edhe produktet elektronike si smartfonët dhe laptopët. Edhe pse ka pasur një pezullim të përkohshëm për disa importe, paqartësia mbetet, dhe shumë kompani po rishikojnë strategjitë e tyre për të mbrojtur të ardhurat.
Në këtë klimë të pasigurt ekonomike, lëvizjet si ajo e Sony mund të jenë vetëm fillimi i një trendi më të gjerë që do të ndikojë konsumatorët globalë.
Burimi: Euronews.com
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
