Pasaporta e Singaporit ruan pozicionin e saj si më e fuqishmja në botë, sipas renditjes më të fundit të publikuar nga Henley Passport Index këtë të martë. Ky shtet i vogël i Azisë Juglindore vazhdon të kryesojë listën pasi më herët këtë vit theu barazinë me gjashtë shtete të tjera për këtë titull. Në fillim të vitit 2024, Singapori ndante vendin e parë me Japoninë, Gjermaninë, Italinë, Spanjën dhe Francën. Megjithatë, renditja e re e publikuar tregon se Japonia dhe Koreja e Jugut tani ndajnë vendin e dytë, ndërsa vendi i tretë ndahet mes shteteve që më parë kryesonin listën, së bashku me Danimarkën, Finlandën dhe Irlandën.
Henley Passport Index është një ndër renditjet më të njohura globale që vlerëson fuqinë e pasaportave bazuar në një kriter të vetëm: numrin e vendeve që mbajtësit e pasaportës mund të vizitojnë pa vizë paraprake. Të dhënat për renditjen bazohen në informacionet e ofruara nga International Air Transport Association (IATA). Ky indeks përqendrohet kryesisht në lehtësinë e udhëtimit, ndryshe nga Nomad Passport Index që llogarit pesë kritere (përfshirë edhe tatimet) dhe është më i përqendruar në konceptin e qytetarisë globale. Sipas të dhënave të fundit:
-
Singaporasit mund të udhëtojnë pa vizë paraprake në 193 destinacione.
-
Ndërsa shtetet në vendin e 10-të kanë akses në 182 vende.
Lexo edhe:Një ëndërr që u kthye në makth: Historia tronditëse e Elizabeth Holmes!
Top 10 pasaportat më të fuqishme në botë për 2024:
-
Singapori
-
Japoni, Kore e Jugut
-
Danimarkë, Finlandë, Francë, Gjermani, Irlandë, Itali, Spanjë
-
Austri, Belgjikë, Luksemburg, Holandë, Norvegji, Portugali, Suedi
-
Greqi, Zelanda e Re, Zvicër
-
Mbretëria e Bashkuar
-
Australi, Çeki, Hungari, Maltë, Poloni
-
Kanada, Estoni, Emiratet e Bashkuara Arabe
-
Kroaci, Letoni, Sllovaki, Slloveni
-
Islandë, Lituani, Shtetet e Bashkuara të Amerikës
Ndërkohë, Shtetet e Bashkuara kanë rënë nga vendi i 9-të në të 10-in, dhe janë pranë daljes nga top 10 për herë të parë në 20 vitet e ekzistencës së këtij indeksi. Edhe Mbretëria e Bashkuar ka zbritur një vend më poshtë, nga e pesta në të gjashtën. Kjo tendencë zbritëse për SHBA dhe MB, sipas Henley & Partners, përfaqëson një “rrjedhë afatgjatë në rënie”, duke reflektuar ndryshimet në politikën ndërkombëtare të udhëtimit dhe reputacionin e këtyre shteteve në skenën globale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
