Nuk ekziston gjë e tillë si publicitet i keq? Aktorja Gwyneth Paltrow është kthyer përkohësisht në zëdhënësen e kompanisë së teknologjisë në qendër të skandalit “kiss cam” gjatë një koncerti të Coldplay. Videoja e re promovuese e Astronomer, me një ton autoironik dhe thumbues, është bërë virale dhe konsiderohet një leksion i shkëlqyer për menaxhimin e krizave të imazhit. Por kush fshihet pas kësaj lëvizjeje të zgjuar? Skandali që përfshiu rrjetet sociale në mënyrë të furishme nuk e rrëzoi kompaninë në qendër të vëmendjes. Përkundrazi, Astronomer vendosi të shfrytëzojë këtë moment të pakëndshëm si një trampolinë publicitare.
Pas incidentit të famshëm ku CEO i martuar i kompanisë, Andy Byron, u filmua duke përqafuar shefen e burimeve njerëzore Kristin Cabot gjatë një koncerti të Coldplay, kompania publikoi një video të re promocionale, me protagoniste Gwyneth Paltrow, ish-bashkëshortja e vokalistit të Coldplay, Chris Martin.Në videon njëminutëshe, Paltrow falënderon publikun për interesin e papritur ndaj kompanisë, që deri pak ditë më parë ishte thuajse e panjohur për publikun e gjerë.
“Jam angazhuar për një periudhë shumë të shkurtër për të folur në emër të mbi 300 punonjësve të Astronomer,” thotë ajo.
“Kompania ka marrë shumë pyetje kohët e fundit dhe ata më kërkuan t’u përgjigjem më të shpeshtave.” Një pyetje shfaqet më pas në ekran: “OMG, what the actual…” — por përpara se të shfaqet fjala përfundimtare (një sharje e njohur me katër shkronja), videoja kalon sërish te Paltrow, e cila vijon duke prezantuar shërbimet që ofron kompania në fushën e automatizimit të të dhënave.
Një tjetër pyetje del në ekran: “Si po ia del skuadra juaj e rrjeteve sociale?” — por ndërpritet sërish nga aktorja, e cila përmend një konferencë të ardhshme të kompanisë në shtator.
“Tani do të rikthehemi tek ajo që dimë të bëjmë më mirë: të ofrojmë rezultate që ndryshojnë lojën për klientët tanë,” përfundon ajo.
Strategjia e Astronomer ka qenë e zgjuar dhe e qartë, të mos e shmangë ”turpin”, por ta përqafojë dhe ta kthejë në avantazh. Në vend që të fshihej pas heshtjes apo mohimeve, kompania e ka përdorur fenomenin e pop-kulturës si një trampolinë për vetë-promovim.
Lexo edhe: “Kur profesionet janë pasion dhe s’të duhet të punosh asnjë ditë” Njihuni me Krist Martiron!
Por Paltrow nuk është i vetmi emër i njohur i përfshirë në këtë kundërpërgjigje thumbuese. Kompania e Ryan Reynolds, Maximum Effort, është angazhuar gjithashtu në realizimin e videos.
“Faleminderit për interesin tuaj, @astronomerio! Tani do të rikthehemi te çfarë dimë të bëjmë më mirë: filma me Hugh Jackman, Fastvertising dhe futboll me Wrexham,” – shkruhet në postimin e Maximum Effort në X.
Pete DeJoy, bashkëthemeluesi dhe CEO i ri i Astronomer, falënderoi Maximum Effort në një postim në LinkedIn:
“Një falënderim i veçantë për ekipin e Maximum Effort për punën e tyre të jashtëzakonshme me zëdhënësen tonë shumë të përkohshme. Siç tha edhe Gwyneth Paltrow, tani është momenti të kthehemi te thelbi ynë: ofrimi i rezultateve transformuese për klientët tanë.”
Pas viralizimit të klipit të njohur si Coldplaygate, fillimisht Byron dha dorëheqjen si CEO i Astronomer, dhe më pas, më 25 korrik, edhe Cabot hoqi dorë nga roli i saj si drejtore e burimeve njerëzore. Nga ana tjetër, transmetimet online të këngëve të Coldplay janë rritur me 20%, sipas të dhënave nga Luminate, ndërsa interesi për Astronomer ka qenë në rritje të vazhdueshme.
Kompania, e themeluar në vitin 2018, ofron shërbime për ndërmarrjet që duan të shfrytëzojnë fuqinë e inteligjencës artificiale për menaxhimin e të dhënave. DeJoy e përshkroi vëmendjen mediatike si “të pazakontë dhe surrealiste”, duke shtuar:
“Ndonëse kurrë nuk do të doja që emri ynë të dilte në pah në këtë mënyrë, Astronomer tani është një emër i njohur në çdo shtëpi.”
Ndërkohë, edhe vetë Chris Martin e ka përmendur incidentin në një koncert të mëvonshëm:
“Do të vendosim disa prej jush në ekranin e madh. Nëse nuk keni bërë make-up-in, tani është momenti!”
Liam Gallagher, gjithashtu, ka bërë shaka në një koncert të Oasis: “Mos u shqetësoni ata që po tradhtojnë – ne nuk kemi kamera si të Coldplay këtu!”
Si për ta bërë edhe më të pabesueshme këtë histori, një lojë kompjuterike e frymëzuar nga momenti viral është tashmë online: Coldplay Canoodlers, ku lojtari luan rolin e kameramanit dhe duhet të identifikojë çiftin duke u përqafuar në turmë.
Madje, fjala “Coldplayed” është futur edhe në fjalor nga Ultimate Classic Rock, me kuptimin:
“Të ekspozohesh pa dashje gjatë një tradhtie, veçanërisht në publik dhe në evente të mëdha.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
