Shtrëngohen masat në Shqipëri. Rikthehet karantina dhe ora policore

Nga 1 shtatori, rikthehet ora policore në fashën orare 23:00 – 06:00. Në këtë mënyrë, Shqipëria i është rikthyer shtrëngimit të masave parandaluese për përhapjen e virusit Covid-19.

Referuar vendimit të komitetit teknik, duke nisur nga data 6 shtator për të hyrë në Shqipëri nevojitet ose certifikatë vaksinimi, tampon PCR i 72 orëve të fundit ose të kenë një provë të kalimit të infeksionit deri në 6 muaj pas shërimit. Ndërkohë, ata që janë rezidentë në Shqipëri dhe që rikhthehen kanë detyrimin që të karantinohen 10 ditë dhe në fund të bëjnë një test.

Lexoni: Covid-19/ Regjistrohen 486 raste të reja, humbin jetën 3 qytetarë

Masat e vendosura nga Komiteti Teknik i Ekspertëve:

• Nga 1 shtatori ora policore shkon nga 23:00 deri në 06:00
• Qytetarët që hyjnë në territorin shqiptar duhet të paraqesin pasaportë vaksinimi 2 javë para hyrjes në fuqi, test pcr ose test të shpejtë brenda 42 orëve ose test kalimi të infektimit brenda 6 muajve
• Përfshihen edhe personat që do të udhëtojnë tranzit
• Në ndërtesën e aeroportit do të lejohen vetëm pasagjerët dhe jo familjarët e tyre
• Detyrimi per maskat në ambientet e mbyllura vazhdon të mbetet në fuqi
• Ata që janë rezidentë në Shqipëri dhe që rikthehen, kanë detyrimin që të vetë-karantinohen 10 ditë dhe në fund të bëjnë një test.

Fëmijët deri në 6 vjeç nuk i nënshtrohen këtyre rregullave.

– Qytetarët shqiptarë rezidentë në Shqipëri, të cilët kthehen dhe nuk kanë një nga dokumentat e sipërcituara, duhet të vetëizolohen për 10 ditë dhe të informojnë autoritetin shëndetësor për të kryer një test në fund të periudhës së izolimit.

– Komiteti i Ekspertëve të Vaksinimit në vlerësim të përgjegjshmërisë qytetare për mbrojtjen e shëndetit publik ka vendosur rekomandimin e vendosjes së vaksinimit të detyruar për grupet më të riskuara nga marrja dhe sidomos nga shpërndarja e infeksionit, duke filluar me stafet mjekësore, me arsimtarët dhe me studentët.

– Vlerësohet që Shtatori, duke qenë muaj i hapur, të jetë periudha që të gjithë stafet mjekësore, arsimtarët dhe studentët, të kryejnë vaksinimin dhe deri në datën 30 Shtator të dorëzojnë vërtetimin pranë qendrës së tyre të punës dhe për studentët pranë zyrave të përcaktuara nga Institucionet e Arsimit të Lartë kopjen e kartës së vaksinimit të dalë nga e-Albania.

– Pas kësaj date, për ata të cilët nuk e kanë, do të kërkohet paraqitja periodike e testit PCR për të verifikuar infektueshmërinë. Përjashtim do të bëhet vetëm për ata që kanë indikacion mjekësor të përcaktuar me dokument mjekësor për mosbërjen e vaksinës. Një dokument i cili do të vlerësohet me përgjegjshmëri përveç mjekut dhe specialistit që e ka dhënë edhe nga specialisti i Institutit të Shëndetit Publik.

– Penaliteti për paraqitjen për marrjen e PCR në mënyrë periodike do të fillojë vetëm pas datës 30 shtator.

– Në ndërtesën e aeroporteve do të lejohen të hyjnë vetëm pasagjerët që udhëtojnë, duke shmangur shoqërimin nga familjarë të tyre. Këta pasagjerë duhet të zbatojnë me rigorozitet mbajtjen e maskës, ashtu siç është rekomanduar dhe siç po reflektohet ky ndryshim edhe në protokollin e funksionimit normal të aeroporteve.

– Vazhdon të mbetet në fuqi urdhri për përdorimin e maskave në ambientet e mbyllura, në qendra tregtare, supermarket, dyqane, transport publik dhe në të gjitha ato vende ku nuk sigurohet distancimi fizik.

– Në të gjitha rastet kur nuk respektohen masat e rekomanduara do të zbatohen penalitetet, siç është ai individual kur qytetari nuk ka përdorur maskën në ambientet e rekomanduara në masën e gjobës 3 mijë lekë nëse është për herë të parë dhe në rast përsëritje në masën 5 mijë lekë. Në rast kur bizneset nuk zbatojnë protokollet e rekomanduara nga Instituti i Shëndetit Publik, masa e penalitetit shkon nga 100,000-700,000 lekë, në varësi të masës e cila nuk është zbatuar.