Seb Ponari, një i ri shqiptar me banim në Angli, ka ndërmarrë një sfidë të jashtëzakonshme: të përshkojë me këmbë 2.750 kilometra nga Cambridge deri në Tropojë. Qëllimi i këtij udhëtimi epik nuk është vetëm fizik, është një përkushtim personal dhe emocional, në nderim simbolik të të atit, i cili ndërroi jetë një dekadë më parë.
Sfida nisi më 10 maj dhe përfshin një itinerar prej 40 ditësh, ku çdo ditë përshkruhen rreth 70 kilometra. Aktualisht, ai ndodhet në Kroaci dhe është i shoqëruar nga një ekip mbështetës prej tre personash: një fizioterapist shqiptar që njëkohësisht është edhe shoferi i rulonit që i shërben si mbështetje lëvizëse, trajneri i tij i vrapit nga Qipro, si dhe dy bashkëkombas – Toni dhe Landi – që ndihmojnë logjistikisht gjatë udhëtimit.
Lexo edhe: Xheneta Krasniqi, shqiptarja e renditur mes “Top Young Women Engineers in Germany 2025”
Në një prononcim për Euronews Albania, Ponari shprehet: “Ky vrap është për babain tim. Po bëj një rrugëtim nga shtëpia ime në Angli drejt varrit të tij në Tropojë. Dua që çdo hap të jetë një nderim për të.”
Kjo iniciativë unike e shqiptarit nuk ka si qëllim vetëm tejkalimin e kufijve të durimit njerëzor, por është edhe një thirrje për ndërgjegjësim dhe mbështetje për shëndetin mendor, për t’iu dhënë forcë të gjithë atyre që vuajnë nga problemet e shëndetit mendor, duke u thënë se çdo gjë është e mundur për t’u përmirësuar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
