Madje autoritetet atje kanë deklaruar se Shqipëria u rendit gati njësoj si Serbia për barrierat tregtare ndaj mallrave nga Kosova.
Barrierat më të theksuara janë për produktet bujqësore, farmaceutike dhe të birrës.
Angazhimi sipërfaqësor i qeverisë shqiptare për të lehtësuar tregtinë nuk ka funksionuar teksa Kosovës i ka humbur durimi.
Qeveria e Kosovës ka kërcënuar se do të vendosë taksë 100% për mallrat nga Shqipëria nëse autoritetet e Shqipërisë nuk i heqin barrierat për birrën, pataten dhe miellin.
Haradinaj, në një konferencë për media, ka deklaruar se shpreson që të zgjidhen problemet e tregtisë që Kosova ka me Shqipërinë, por nuk ka pohuar e as mohuar nëse do t’i vendoset taksë edhe Shqipërisë.
Kryeministri i Kosovës Ramush Haradinaj, i pyetur lidhur me mundësinë e vendosjes së barrierave tarifore ndaj Shqipërisë, ka thënë se “shpresoj që të zgjidhen këto probleme. Me Shqipërinë kemi marrëdhënie të mira, por kemi disa mosmarrëveshje që lidhen me tregtinë, për tregun dhe shpresoj që do t’i zgjedhim”.
Gjithashtu, drejtori ekzekutiv i “Klubit të Prodhuesve”, Astrit Panxha, ka paralajmëruar edhe masa të tjera, ku në shenjë proteste do të mbyllet kufiri për një ditë në sezonin e verës.
Ai ka treguar po ashtu se tregu me Shqipërinë është i njëanshëm.
“Për ne, tregu i Shqipërisë si prodhues është tregu më interesant, por është treg edhe për shkak të lidhjeve gjeografike e etnike. Për fat të keq, kjo nuk po ndodh në të vërtetë. Pasi nëse i shohim statistikat për periudhën e vitit të kaluar, eksportet e Shqipërisë janë rritur në Kosovë për 20 milionë, kurse ato të Kosovës vetëm për 1 milion”.
Kurse kryetari i Odës Ekonomike të Kosovës, Berat Rukiqi, ka renditur një varg problemesh tregtare me Shqipërinë dhe barrierat e krijuara.
“Kemi shumë çështje të pazgjidhura, probleme që janë të mbledhura që një dekadë dhe nuk ka vullnet politik për t’i zgjidhur. Te prokurimet publike, eksporti, qoftë çfarëdo lloj partneriteti që është tentuar të ndërtohet nga kompanitë tona është penguar nga autoritetet në Shqipëri. Kompanitë nuk kanë arritur deri tani të kenë një pozicion të duhur në tregun e Shqipërisë. Për kompanitë tona është tregu kryesor apo do të duhej të ishte”, ka thënë Rukiqi.
Ai rekomandoi që marrëveshjet e arritura midis Kosovës dhe Shqipërisë të respektohen.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
