Shqipëria në flakë! 24 vatra zjarri aktive, shënohet viktima e parë

Zjarret verore janë bërë një fenomen i zakonshëm në Shqipëri dhe Europë. Këtë verë, vala të shumta të nxehtësisë kanë përfshirë kontinentin, duke krijuar kushte optimale për përhapjen e flakëve. Sipas mediave europiane, një sipërfaqe pothuajse sa Luksemburgu është djegur deri tani nga zjarret. Ekspertët paralajmërojnë se ndryshimet klimatike po përkeqësojnë situatën.

Situata e 24 orëve të fundit në vend paraqitet e rëndë: një person ka humbur jetën në zonën e Gramshit, ndërkohë që janë shkatërruar banesa, dy stane dhe kafshë, si dhe një sipërfaqe e madhe pyjore. Agjencia e Mbrojtjes Civile raportoi se aktualisht mbeten aktive 24 vatra zjarri, ndërkohë që mbi 10,000 forca emergjencash janë të angazhuara në terren.Ndërhyrjet janë intensifikuar dhe përshtatur sipas situatës në terren, megjithëse temperaturat e larta dhe era kanë vështirësuar kontrollin e flakëve. Sipas sinoptikaëve temperaturat do të kenë një zbritje minimale duke filluar nga nesër, ndërsa rreshjet e para të shiut priten nga data 23-24 gusht.

Situata në vatrat më kritike:

Qarku Vlorë – Bashkia Delvinë & Finiq

Në Delvinë, zjarri i depërtuar nga Syri i Kaltër ka përfshirë fshatrat Pecë, Sirakat dhe Kardhikaq, duke arritur deri pranë kurorës së bashkisë. Flakët u shtrinë nga Vllahati drejt Kakodhiqit, duke shkaktuar djegien e 5 shtëpive, prej të cilave 4 të pabanuara.

Në operacione janë angazhuar 36 efektivë zjarrfikës me 5 mjete, 120 trupa të FA, forca të FNSH, Delta, Shqiponjat, policia vendore dhe bashkiake, si dhe 7 autobote uji. Zjarri është zhvendosur mbi fshatin Vllahat, ku po ndërhyhet nga ajri me helikopterë çekë dhe sllovakë.

Në Finiq, vazhdon aktive vatra që ka prekur zonën nga Syri i Kaltër deri në pllajën e malit të Gjerë dhe Sopotit. Në Bistricë, vatra po mbahet nën monitorim. Në Parkun e Rëzomës, mbi tunelin e Skërficës, zjarri vijon, por terreni i vështirë nuk lejon ndërhyrje.

Qarku Elbasan – Bashkia Gramsh

Në Kullollas dhe njësinë Skënderbegas, zjarri ka marrë përmasa të mëdha, duke përfshirë disa fshatra dhe shkaktuar një viktimë. Janë raportuar dëme në banesa. Situata mbetet e rëndë dhe po ndërhyhet nga ajri. Në Mukaj e Sojnik, zjarri vijon në sipërfaqe me shkurre dhe ferra, me forcat vendore dhe FA në terren.

Qarku Gjirokastër – Bashkia Tepelenë

Në Hormovë, rreziku për banesat është shmangur, por puna për shuarjen vazhdon. Në Turan, flakët janë përhapur drejt Lekelit dhe Koderit, duke djegur dy stalla dhe kafshë. Në terren kanë operuar forca zjarrfikëse, policore, bashkiake, vullnetare dhe ushtarake, si dhe helikopterë çekë e sllovakë.

Qarku Shkodër – Bashkia Fushë Arrëz

Në Xeth, vatra po digjet në një zonë me pisha. Janë angazhuar forca të shumta nga FA, MZSH, policia dhe shërbimi pyjor. Situata paraqitet më e qetë, por puna vijon për izolimin e plotë.

Qarku Tiranë

Në malin e Bërzhitës dhe fshatin Durishtë, zjarri është mbajtur nën kontroll me ndërhyrje nga ajri dhe toka. Në zonën Arbanë (Damjan e Isufaj), flakët morën përmasa të mëdha dhe u ndërhy me helikopter kroat. Në Ferraj dhe Zall-Herr, vatrat po mbahen nën monitorim, ndërsa në Kryevidh të Rrogozhinës janë djegur rreth 100 ha dhe dy shtëpi të pabanuara.

Qarku Dibër

Në malin me Gropa, Biz të Martaneshit, zjarri vazhdon në zonë të mbrojtur, larg banesave. Në Ternovë, operacioni vazhdon me forca vendore dhe të FA.

Qarku Korçë – Bashkia Kolonjë

Në Gërmenj, zjarri në pyjet me pisha zhvillohet në terren të vështirë, me shpërthime municionesh në perimetrin e flakëve. Ndërhyrja e drejtpërdrejtë është e vështirë dhe po mbahet nën mbikëqyrje.

Puna po vijon ndërkohë edhe në vatrat ku nuk ka rrezik për banesa apo gjënë e gjallë.