Ministrja e Ekonomisë dhe Inovacionit, Delina Ibrahimaj, kryesoi mbledhjen e parë të Këshillit Kombëtar të Punës për vitin 2026. Gjatë fjalës së saj, ministrja u ndal te një sërë çështjesh prioritare që pritet të adresohen gjatë këtij viti në fushën e punësimit, përfshirë mungesën e fuqisë punëtore, rritjen graduale të pagës minimale, si dhe ndryshimet e planifikuara në Kodin e Punës.
Ministrja nënvizoi se viti 2026 pritet të jetë i ngarkuar me ndryshime ligjore të rëndësishme në fushën e punës, në kuadër të procesit të integrimit të Shqipërisë në Bashkimin Europian. Këto ndryshime do të përfshijnë rishikimin e Kodit të Punës, si dhe të gjithë legjislacionit nënligjor, me fokus përafrimin me direktivat europiane dhe përcaktimin e periudhave tranzitore për zbatimin efektiv të tyre.
Një vëmendje e veçantë iu kushtua edhe mungesës së fuqisë punëtore dhe ndikimit të migracionit. Ibrahimaj theksoi se qeveria shqiptare ka miratuar një strategji kombëtare për migracionin, e cila parashikon masa konkrete për adresimin e kësaj problematike. Ajo shtoi se përveç përpjekjeve për kualifikimin e fuqisë punëtore vendase, po ndërmerren hapa edhe për plotësimin e nevojave të tregut përmes marrëveshjeve me vende të treta.
Lexo edhe: Rritje rekord e bizneseve të reja në Shqipëri në 2025-ën, QKB publikon të dhënat
Ministrja theksoi se politika e rritjes së pagës minimale do të vijojë edhe në vitet në vijim, me synimin që ajo të arrijë në nivelin 60% të pagës mesatare. Kujtojmë se nga 1 janari 2026 ka hyrë në fuqi paga e re minimale, e cila është rritur nga 40 mijë lekë në 50 mijë lekë.
Në këtë kuadër, në rendin e ditës do të përfshihen edhe diskutimet për reformën e pensioneve, si edhe çështjet që lidhen me statusin e minatorëve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
