Në mbështetje të nenit 14, pika 6 të Ligjit nr. 25/2022 “Për mbështetjen dhe Zhvillimin e Startup-eve”, i ndryshuar, të pikës 14, Kreu V, të Vendimit të Këshillit të Ministrave nr. 61, datë 7.2.2024 “Për miratimin e kërkesave e të kritereve që duhet të plotësojnë start up-et dhe lehtësuesit e startup-eve, të procedurave e të afateve, si dhe të rregullave për përbërjen e komisionit të vlerësimit dhe ankimit, kritereve, procedurës së përzgjedhjes e të shpërblimit të anëtarëve të tyre, shpallen projektet fituese të mbështetjes me grante nga qeveria shqiptare.
Pas një procesi të kujdesshëm dhe të detajuar të vlerësimit të 539 aplikimeve të mbërritura nga të gjitha qytetet e vendit, janë përzgjedhur startup-et që do të sigurojnë financimin nëpërmjet skemës Grant2024, për të realizuar projektin e tyre inovativ. Ky grant, me një fond total prej 300 milionë lekësh, përfaqëson një nga nismat më të fuqishme të akorduara nga qeveria shqiptare në mbështetjen e inovacionit dhe zhvillimit të startup-eve në vend. Thirrja e mbështetjes, e cila u hap më 16 shkurt të këtij viti, është shprehje e përpjekjeve të qeverisë shqiptare për të rritur mundësitë për sipërmarrësit dhe për të kontribuar në zhvillimin ekonomik të vendit.
Fituesit e përzgjedhur do të përfitojnë nga financimi në tre faza të ndryshme të zhvillimit të tyre. Faza e parë e financimit është projektuar për mbështetjen e individëve në fazë ideje ku janë përzgjedhur 22 projekte, të cilët sigurojnë deri në 1.5 milionë lekë për ta realizuar dhe për të krijuar një bazë të qëndrueshme për sipërmarrjen e tyre. Për fazën e dytë janë përzgjedhur 54 projekte fituese, startup-e që tashmë kanë një produkt apo shërbim dhe kanë krijuar një prototip. Përfituesit e kësaj faze sigurojnë deri në 4.5 milionë lekë për të avancuar zhvillimin e biznesit të tyre dhe për të gjetur klientë të mundshëm në treg. Në fazën e tretë janë përzgjedhur 18 startup-e fituese, të cilët ofrojnë një produkt në treg dhe me mbështetjen e siguruar nga Grant2024 do të zgjerojnë aktivitetet e tyre në tregje të reja. Startup-et ne këtë faze do të përfitojnë deri në 9 milionë lekë për të rritur dhe zhvilluar biznesin e tyre.
Lexo edhe:“BE për Bashkitë” përmbyll një rrugëtim 3-vjeçar në mbështetje të 19 Bashkive shqiptare
Projektet fituese janë të kategorizuara sipas sektorëve dhe nën-sektorëve industrialë, konkretisht: 14 fitues nga fusha e IT-së, 8 fitues nga AI, 7 fitues nga E-commerce, 6 fitues nga Prodhimi, 6 fitues nga EdTech, 4 fitues nga HealthTech, 5 fitues nga FinTech, 5 fitues nga Lojërat Elektronike, përkatësisht nga 4 fitues për Business Services, Energjitikë, Turizëm, Marketing; 3 fitues nga AgriTech; përkatësisht nga 2 fitues për ESG, Siguria Kibernetike, Robotika, Logjistika, SportTech Ekonomia Ricikluese si edhe përkatësisht nga 1 fitues për Fashion, Media, Turizëm Profesional, Zhvillim Profesional, Blockchain dhe Infrastrukturë.
Thirrja për masa mbëshetëse, Grant2024 është vetëm një nga shumë programet dhe iniciativat që qeveria Shqiptare ka planifikuar për të mbështetur dhe zhvilluar ekosistemin e startup-eve në Shqipëri. Në këtë kuadër, qeveria po do të miratojë së shpejti një strategji të re për zhvillimin e kompanive inovative, e cila do të përfshijë krijimin e instrumenteve të reja financiare dhe përmirësimin e kushteve për financimin alternative të startup-eve. Kjo strategji synon të krijojë një mjedis më të favorshëm për rritjen e inovacionit dhe të nxisë bashkëpunimin ndërmjet sektorit privat, akademisë dhe institucioneve qeveritare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
