Shoqata Shqiptare e Turizmit ka kërkuar pranë Komitetit Teknik të Ekspertëve të hiqet masa kufizuese, që lidhen me orën policore. Për këtë, ata janë bazuar në praktikat që po aplikojnë vendet fqinje.
Zak Topuzi, Kryetar i Sektorit të Hoteleve në Shoqatën e Turizmit Shqiptar (ATA) shprehet se industria e bareve dhe restoranteve, e lidhur ngushtë me turizmin, është sektori i vetëm që po vuan pasojat shkatërruese të pandemisë.
Duke iu drejtuar Komitetit të Ekspertëve, ai ka theksuar se “Vetëm sektori turizmit ( hotele, restorante, bare dhe evente ) vazhdojnë të jenë të penalizuar me orare kufizuese, duke e kthyer këtë industri, në të vetmen “viktimë” që po vuan pasojat dyvjeçare”.
Ai kujton se, Greqia nga 1 Marsi fillon sezonin turistik, duke hequr çdo masë kufizuese, madje janë lehtësuar ekstremisht këto masa. Italia ka lehtësuar së fundi lëvizjet, duke hapur mundësinë e aktivitetit për lokalet e natës.
Ndaj i bën thirrje komitetit të propozojë urgjentisht heqjen e të gjitha kufizimeve për t’i dhëne frymëmarrje kësaj industrie që vuan e vetme pasojat shkatërruese të pandemisë.
Lexo: Thirrje për mbështetje financiare të Projekteve në Turizëm. Afati për aplikime deri me 23 shkurt
Ora policore në Shqipëri vijon të nisë në 23:00 dhe përfundon në 6:00. Ndërkohë që, Komiteti Teknik i Ekspertëve nuk mblidhet prej disa javësh për të vendosur nëse do të ketë ndryshime të masave kufizuese, përsa kohë numri i të prekurve nga COVID-19 është në rënie të ndjeshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
