Shkencëtarët frymëzohen nga Star Wars, krijojnë lëkurën artificiale

Shkencëtarët në Singapor kanë krijuar një “lëkurë elektronike” të aftë për të rikrijuar ndjesinë e prekjes. Ata shpresojnë se kjo risi do t’u lejojë njerëzve me gjymtyrë të dëmtuar, që mbajnë proteza të përcaktojnë objekte, si dhe të ndiejnë cilësi të objekteve, temperaturë madje edhe dhimbje.

Pajisja, e quajtur ACES, ose Lëkura Elektronike e Kodifikuar Asinkron (Asynchronous Coded Electronic Skin), është e përbërë nga 100 sensorë të vegjël dhe është me madhësi rreth 1 cm katror (0,16 inç katror).

Studiuesit e Universitetit Kombëtar të Singaporit thonë se lëkura elektronike mund të përpunojë informacionin më shpejt sesa sistemi nervor i njeriut, është në gjendje të njohë 20 deri në 30 përbërës të ndryshëm dhe mund të lexojë shkronjat e sistemit Braille me më shumë se 90% saktësi.

“Njerëzit duhet të rrëshqasin dorën për të ndjerë strukturën e objekteve, por në këtë rast lëkura, me vetëm një prekje të vetme, është në gjendje të zbulojë struktura të ndryshme,” tha drejtuesi i ekipit kërkimor Benjamin Tee, duke shtuar se algoritmet e Inteligjencës Artificiale e lejojnë pajisjen të mësojë shpejt.

Një demonstrim tregoi që pajisja mund të zbulonte se një top antistres ishte i butë dhe mund të përcaktonte që një top plastik ishte i fortë. “Kur e humbni ndjesinë e prekjes, në thelb bëheni të mpirë … dhe përdoruesit e protezave përballen me këtë problem,” tha Tee.

“Pra, duke rikrijuar një version artificial të lëkurës, për pajisjet e tyre protetike, ata mund të mbajnë një dorë dhe të ndiejnë ngrohtësinë apo butësinë e objekteve, përmes kësaj lëkure” shtoi Tee.

Tee shpjegoi se koncepti ishte frymëzuar nga një skenë nga trilogjia e filmit “Star Wars” në të cilën personazhi Luke Skywalker humbet dorën e djathtë dhe e zëvendëson me një pajisje robotike, në dukje e aftë t’i rikthejë ndjesinë e të prekurit.

Teknologjia është ende në fazën eksperimentale, por ka pasur “interes të jashtëzakonshëm”, veçanërisht nga komuniteti mjekësor, shtoi Tee.

Reuters