Arrihet marrëveshja me Shell, pas dy vitesh negociata Ministria e Energjetikës dhe Kompania SHELL kanë rënë dakord për firmosjen e marrëveshjes për shfrytëzimin e zonës naftëmbajtëse në zonën katër. Marrëveshja e cila pritet të miratohet nga Këshillin e Ministrave parashikon të realizojë investime rreth 42 milionë euro në 7 vitet e ardhshme në Bllokun 4, i cili ndodhet në zonën e Dumresë.
Sipas marrëveshjes, kërkimi i naftës në këtë Bllok do të kryhet në 3-faza; Gjatë Fazës së Parë e cila do të zgjasë 3 vjet do të kryhen 125 km punime seismike 2D dhe ripërpunim i 125 km profileve seismike 2D. Angazhimi financiar minimal për Fazën e Parë shkon në rreth 8.5 milion USD. Faza e Dytë do të zgjasë 2 vjet. Gjatë kësaj faze do të kryhen 300 km punime seismike 2D dhe ripërpunim i 200 km profileve seismike 2D. Gjatë kësaj faze është opsional shpimi i një pusi kërkimi me thellësi 3000 m.
Angazhimi financiar minimal për Fazën e Dytë shkon në rreth 20 milion USD. Faza e tretë do të zgjasë 2 vjet. Gjatë kësaj faze do të kryhet shpimi i një pusi kërkimi me thellësi minimale 3000 m dhe Angazhimi financiar minimal për këtë fazë arrin në 14 milion USD. Kohëzgjatja e kontratës për rastin nëse do të kemi një zbulim të ri, pra periudha e Zhvillim-Prodhimit, do të jetë deri në 25 vjet me të drejtë zgjatje.
Në janar të këtij viti kompania SHELL njoftoi nisjen e operacionit për pusin Shpiragu 4. Kostoja e këtij operacioni pritet t’i kalojë 70 milionë dollarë në pak më shumë se një vit. Thellësia e shpimit llogaritet të jetë 6101 metra.
Gu-4 klasifikohet si një pus i thellë dhe është pusi i katërt që shpohet nga kompania Shell Upstream Albania, pas atyre Shpiragu-2, Molishti-1 dhe Shpiragu-3. Për të ardhur deri tek shpimi i pusit, kompania ka kryer më parë një volum punimesh sizmike dhe një sërë studimesh përgjithësuese gjeologjike.
Kompania Shell, punon prej vitesh në kërkime në Shqipëri. Shpiragu-2, vlërësohet të ketë rezultuar i suksesshëm pasi në përfundim të shpimit dhe testimit të këtij pusit në fund të vitit 2013, kompania Shell ka deklaruar se ka bërë një zbulim të ri në pusin Shpiragu-2. Për të vlerësuar kapacitetin naftëmbajtës të zonës janë duke u shpuar disa puse vlerësimi, sipas një Programi Vlerësimi.
Ky program ka për qëllim të vlerësojë naftë dhënien, të përcaktojë madhësinë e rezervuarit dhe qëndrueshmërinë ekonomike të projektit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
