SHBA ka zgjeruar përjashtimin e përkohshëm nga sanksionet për blerjen e naftës ruse të mbetur në det, që më parë aplikohej vetëm për Indinë, duke e bërë atë të vlefshme për të gjitha vendet në botë, si pjesë e përpjekjeve për të lehtësuar presionin mbi çmimet globale të energjisë. Sekretari i Thesarit Amerikan, Scott Bessent, njoftoi të enjten se departamenti po lëshon një autorizim të përkohshëm që lejon vendet e botës të blejnë naftën ruse aktualisht të bllokuar në det. Sipas deklaratës së Sekretarit Bessent të shpërndarë në X, ky hap synon “të rrisë mbulimin global të furnizimit ekzistues” duke adresuar pasigurinë e shkaktuar nga lufta në Iran. Ky masë zgjeron përjashtimin 30-ditor që më parë u dha vetëm rafinerive indiane.
Sekretari Bessent theksoi se autorizimi “nuk do të sjellë përfitime të konsiderueshme financiare për qeverinë ruse, e cila gjeneron shumicën e të ardhurave të saj energjetike nga taksat e vëna në pikën e nxjerrjes.”
Përjashtimi i përgjithshëm për Rusinë u publikua të njëjtën ditë nga Zyra për Kontrollin e Aseteve të Huaja (OFAC) e Thesarit Amerikan. Ai kufizon qartë përdorimin vetëm për dërgesat tashmë të ngarkuara dhe përjashton çdo tregti të re, në përputhje me kuadrin më të gjerë të sanksioneve të SHBA.
Ky vendim është iniciativa më e fundit e administratës Trump për të përmbajtur volatilitetin e çmimeve të naftës. Ndërprerjet në Ngushticën e Hormuzit, për shkak të sulmeve të përsëritura iraniane ndaj infrastrukturës dhe anijeve të naftës, kanë ngushtuar rrugët e furnizimit.
Të mërkurën, Agjencia Ndërkombëtare e Energjisë (IEA) njoftoi shpërndarjen më të madhe emergjente të rezervave të saj në histori, me vendet anëtare që ranë dakord të lëshojnë 400 milion fuçi naftë, prej të cilave SHBA konfirmoi 172 milion fuçi.
Lexo edhe: Një epokë e re për fintech, Revolut bëhet zyrtarisht bankë në Britani
Megjithatë, sulmet e vazhdueshme iraniane dhe frika nga mbyllja e gjatë e ngushticës kanë neutralizuar efektin e pritshëm të ndërhyrjes së IEA, duke bërë që çmimet e naftës të mbeten mbi $100 për fuçi.
Gjithashtu, të enjten u raportua se administrata Trump po planifikon pezullimin e Ligjit Jones të vitit 1920 për të lehtësuar kostot e karburantit në SHBA. Ky ligj kërkon që mallrat e transportuara mes porteve amerikane të përdorin vetëm anije të ndërtuara, të zotëruara dhe me ekuipazh amerikan. Pezullimi do t’i lejojë tankerëve të huaj të transportojnë më lirë mallrat përgjatë bregut amerikan.
Në sfondin e këtyre shqetësimeve për furnizimin, zgjerimi i përjashtimit për naftën ruse mbërrin si një masë shtesë për të përballuar pasigurinë që ende nuk është zgjidhur nga injektimet rekord të rezervave dhe masat e tjera të pritura.
Në kohën e shkrimit, çmimet e naftës tregtohen pak mbi 100 dollarë për fuçi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
