40 miliardë dollarë ndihmë shtesë për Ukrainën është paketa e re e miratuar nga Dhoma e Përfaqësuesve në Shtetet e Bashkuara, ku Kongresi po përpiqet të vazhdojë rrjedhën e ndihmave ushtarake dhe të forcojë qeverinë në Kiev, për t’u përballur me agresionin rus. Paketa tani pritet të kalojë për miratim në Senat.
“Populli ukrainas ka nevojë për ne, ata kanë nevojë për ndihmën tonë në mënyrë dëshpëruese”, tha Rosa DeLauro, kryetare e Komitetit për ndarje buxhetore në Dhomën e Përfaqësuesve. “Vladimir Putin dhe bashkëpunëtorët e tij duhet të konsiderohen përgjegjës. Kjo masë e bën një gjë të tillë duke mbrojtur demokracinë, duke kufizuar agresionin rus dhe duke forcuar sigurinë tonë kombëtare”, shtoi ajo. Paketa synon t’i ofrojë ndihmë ushtrisë ukrainase dhe ekonomisë së këtij shteti, të ndihmojë aleatët rajonalë, ndersa parashikon ndërkohë edhe 5 miliardë dollarë për të ndihmua në ngërcin e mungesave të furnizimit global me ushqime pas krizës së shkaktuar nga lufta.
Lexo edhe: Lufta e Ukrainës është lufta e të gjithëve
Por ish-presidenti rus, Dimitry Medvedev reagoi ashpër ndaj kësaj lëvizjeje të Washingtonit, duke i akuzuar Shtetet e Bashkuara se në këtë mënyrë i kanë shpallur luftë Rusisë “përmes një shteti tjetër”. Në një mesazh të postuar online, ai tha se Amerika do të vuajë më shumë nga kjo paketë e do të humbasë edhe ndikimin e saj në botë. “Nuk do të funksionojë. Printimi i parave po rrit ndjeshëm inflacionin dhe borxhin e qeverisë amerikane, do të gjunjëzohen shpejt”, ka deklaruar Medvedev, një prej aleatëve më besnikë të Vladimir Putinit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
