Tirana u bë dje qendra e një ndryshimi të rëndësishëm në industrinë e modës dhe teknologjisë me lançimin e Doll’App, platformës së parë në rajon që mundëson shitjen e veshjeve të përdorura në mënyrë të thjeshtë dhe të qëndrueshme. Në një event dinamik te Piramida, sipërmarrës, ekspertë të teknologjisë dhe influencues të modës u mblodhën për të diskutuar sesi teknologjia po transformon tregun e modës dhe sjelljen e konsumatorëve.
Me një përvojë të gjatë në media dhe moderim eventesh, moderatorja e mbrëmjes, Neada Muçaj, solli një energji të veçantë në event, duke udhëhequr bisedat me një panel të përzgjedhur ekspertësh.
Në panelin e diskutimit, Estela Ujka, një nga influencueset më të njohura të modës në Shqipëri, ndau me të pranishmit ndikimin e rrjeteve sociale në tendencat e blerjeve dhe sesi teknologjia po ndryshon mënyrën se si konsumatorët ndërveprojnë me markat dhe produktet.
Nga ana teknologjike, Ergest Nako, CTO i Doll’App, shpjegoi sesi kjo platformë inovative po krijon një treg më të zgjuar dhe më të qëndrueshëm për veshjet e përdorura. Po ashtu, Briseida Gjoza, CEO e ConsciESG, theksoi rëndësinë e qëndrueshmërisë në investime dhe ndikimin që mund të ketë tek industria e modës.
Një moment i rëndësishëm i mbrëmjes ishte prania e Ambasadorit të Suedisë në Shqipëri, i cili nënvizoi mbështetjen e Suedisë për startup-et shqiptare përmes Challenge Fund, një nismë që ka ndihmuar Doll’App të bëhet realitet.
Kush qëndron pas Doll’App?
Në qendër të kësaj nisme qëndron Aneida Bajraktari, një sipërmarrëse e njohur, themeluese e disa bizneseve të suksesshme në Shqipëri. Pas eksperiencës së saj me Balkans Capital, një kompani konsulence financiare dhe ligjore, si dhe suksesit të saj me Adams Chips, ajo ka sjellë Doll’App si një zgjidhje për mbipopullimin e garderobave dhe një hap drejt një ekonomie më të qëndrueshme.
Lançimi i Doll’App shënon një moment kyç për Shqipërinë, duke sjellë një risi në tregun e shitjeve online të veshjeve. Platforma synon të ndërgjegjësojë konsumatorët për rëndësinë e ripërdorimit, kursimit dhe mbrojtjes së mjedisit përmes një modeli ekonomik të përfitueshëm për të gjithë.
Eventi përfundoi me një atmosferë festive, me pjesëmarrësit që patën mundësinë të testonin platformën dhe të zbulonin surpriza të veçanta. Me këtë nisje të suksesshme, Doll’App synon të bëhet një nga platformat më të rëndësishme të modës së qëndrueshme në rajon.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
