Rrjedhja e trurit është sot një prej problemeve kryesore të 6 vendeve të Ballkanit Perëndimor, por ndoshta më akut fenomeni paraqitet për Shqipërinë e Maqedoninë e Veriut. Shifrat janë shokuese, shkruante së fundi Marjan Icoski i “German Marshall Fund”.
Në tre dekadat e fundit Shqipëria ka humbur 37% të qytetarëve të saj niveli më i lartë në rajon nëse i qëndrojmë të dhënave të EUObserver, sias të cilave, si pasojë e emigracionit masiv Serbia ka humbur 9% të qytetarëve, Maqedonia e Veriut 10%, Bosnje e Hercegovina, 24%.
Shumica janë të rinj, theksohet në artikull, të arsimuar dhe të zotë, të cilët, vazhdon si me ironi shkrimi, kanë zgjedhur të votojnë “me këmbët e tyre”. Ritmi dhe intensiteti i këtij problemi, e rendit Ballkanin Perëndimor ndër të parët në botë për “largimin e trurit”. Llogaritet qe në dekadat e ardhshme, ai të humbasë 25-50 për qind të të rinjve të talentuar.
Duke pasur parasysh gjendjen aktuale, duhet qe vendet e rajonit, thote Icoski, të reshtin së menduari vetëm se si t’i mbajnë të rinjtë në shtëpi, dhe të fillojnë të punojnë me synimin të tërheqin mbrapsht ata që janë larguar tashmë. Studimet e fundit tregojnë se po zvogëlohet dallimi mes faktorëve shtytës ekonomikë dhe atyre joekonomikë për emigrimin e të rinjve nga Ballkani Perëndimor. Historikisht, të rinjtë janë larguar nga kjo zone për paga më të larta dhe punë më të mira, por tani, ata kërkojnë më shumë dhe po ikin për të pasur një cilësi më të lartë të shërbimeve publike, arsimit, kujdesit shëndetësor, qeverisjes apo mjedisit./ GMF
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
