Startupi Augmental po revolucionarizon mënyrën se si njerëzit me aftësi të kufizuara ndërveprojnë me teknologjinë, duke u mundësuar atyre të përdorin telefona dhe pajisje të tjera duke përdorur vetëm gjuhën, gojën dhe lëvizjet e kokës.
Tomás Vega zhvilloi MouthPad-in përmes startupit të tij, Augmental, për të ndihmuar njerëzit me aftësi të kufizuara të ndërveprojnë me teknologjinë vetëm duke përdorur gjuhën dhe lëvizjet e kokës.
Kur Tomás Vega ishte 5 vjeç, ai filloi të belbëzojë dhe të kishte vështirësi në artikulim. Ky përjetim i dha atij një ndjeshmëri për vështirësitë që mund të sjellë një aftësi e kufizuar. Gjithashtu, e intrigoi atë për fuqinë e teknologjisë dukeqenëse ai ishte një entuziast i saj.
“Një tastierë dhe një mouse ishin mjetet,” thotë Vega. “Ato më lejuan të jem i rrjedhshëm në gjërat që bëja. Munda të tejkaloj kufizimet e mia në një mënyrë, kështu që u bëra i përkushtuar pas zgjerimit të aftësive njerëzore bashkangjitur koncepteve teknologjike. Gjithashtu, fitova empati. Mendoj se të gjithë kemi empati, por e aplikojmë atë në mënyrë të kufizuar sipas përvojave tona.”
Vega ka përdorur teknologjinë për të zgjeruar aftësitë njerëzore që nga fëmijëria. Ai filloi të programojë kur ishte 12 vjeç. Në shkollën e mesme, ai ndihmonte njerëzit të menaxhonin aftësitë e kufizuara si dëmtimet e duarve dhe sklerozën e shumëfishtë. Në universitet, fillimisht në Universitetin e Kalifornisë në Berkeley dhe më pas në MIT, Vega ndërtoi teknologji që ndihmuan njerëzit me aftësi të kufizuara të jetojnë më në mënyrë të pavarur.
Sot, Vega është bashkëthemelues dhe CEO i Augmental, një startup që përdor teknologjinë për të lejuar njerëzit me kufizime të lëvizjes të ndërveprojnë pa probleme me pajisjet e tyre personale kompjuterike.
Inovacioni me MouthPad-in
Produkti i parë i Augmental është MouthPad, i cili lejon përdoruesit të kontrollojnë kompjuterin, smartfonin ose tabletin përmes lëvizjeve të gjuhës dhe kokës. Touchpad-i i ndjeshëm ndaj presionit i MouthPad vendoset në pjesën e sipërme të brendisë së gojës dhe, duke punuar me një palë sensorë lëvizjeje, përkthen gjestet e gjuhës dhe kokës në lëvizje të kursorit dhe në klikime në kohë reale përmes Bluetooth-it.
“Kemi një pjesë të madhe të trurit që është e dedikuar për kontrollin e pozicionit të gjuhës,” shpjegon Vega. “Gjuha përbëhet nga tetë muskuj dhe shumica e fibrave muskulore janë të tipit të ngadaltë, që do të thotë se nuk lodhen shpejt. Kështu që, mendova, pse të mos e shfrytëzojmë këtë?”
Ndikimi i teknologjisë së Augmental
Njerëzit me dëmtime të shtyllës kurrizore po e përdorin tashmë MouthPad-in çdo ditë për të ndërvepruar me pajisjet e tyre të preferuara në mënyrë të pavarur. Një nga përdoruesit e Augmental, që jeton me kuadriplegji dhe studion matematikë dhe shkenca kompjuterike në kolegj, thotë se pajisja e ka ndihmuar të shkruajë formula matematike dhe të studiojë në bibliotekë, raste ku pajisjet e tjera ndihmëse bazuar në zërin nuk ishin të përshtatshme.
“Tani ajo mund të marrë shënime në klasë, të luajë lojëra me miqtë e saj,” thotë Vega. “Ajo është më e pavarur. Nëna e saj na tha se marrja e MouthPad ishte momenti më i rëndësishëm që nga dëmtimi i saj.”
Kjo është qëllimi përfundimtar i Augmental: të përmirësojë aksesueshmërinë e teknologjive që janë bërë një pjesë integrale e jetëve tona.
“Shpresojmë që një person me një dëmtim të rëndë të dorës të jetë po aq i aftë të përdorë një telefon ose tablet sa dikush që përdor duart e tij,” thotë Vega.
Me MouthPad, përdoruesit mund të lëvizin kursorin lart, poshtë, majtas dhe djathtas duke rrëshqitur gjuhën e tyre. Ata gjithashtu mund të bëjnë klikim të djathtë duke bërë një gjest sikur po pinë, dhe klikim të majtë duke shtypur qiellzën e gojës. Për personat me më pak kontroll të gjuhës, mund të përdoren kafshime, shtrëngime dhe gjeste të tjera, ndërsa për ata me më shumë kontroll të qafës, mund të përdoret gjurmimi i kokës për të lëvizur kursorin në ekran. “Shpresa jonë është të krijojmë një ndërfaqe multimodale, kështu që ju mund të zgjidhni atë që funksionon për ju,” thotë Vega. “Ne duam të jemi të përshtatshëm për çdo gjendje.”
Vizion i MouthPad
Shumë nga përdoruesit aktualë të Augmental kanë lëndime në shtyllën kurrizore, me disa që nuk mund të lëvizin duart dhe të tjerë që nuk mund të lëvizin kokën. Lojtarët dhe programuesit gjithashtu e kanë përdorur pajisjen. Përdoruesit më të shpeshtë të kompanisë ndërveprojnë me MouthPad çdo ditë deri në nëntë orë.
“Është mahnitëse sepse do të thotë që ka integruar vërtet pa probleme në jetën e tyre dhe ata po gjejnë shumë vlerë në zgjidhjen tonë,” thotë Vega.
Augmental shpreson të marrë miratimin nga Administrata e Ushqimit dhe Barnave e SHBA-së (FDA) brenda vitit të ardhshëm për të ndihmuar përdoruesit të kontrollojnë objekte si karrocat elektrike dhe krahët robotikë. Miratimi nga FDA gjithashtu do të mundësojë rimbursime sigurimi për përdoruesit, gjë që do ta bëjë produktin më të aksesueshëm.
Augmental tashmë po punon në versionin e ardhshëm të sistemit të tij, i cili do t’i përgjigjet pëshpëritjeve dhe lëvizjeve edhe më të ndjeshme të organeve të brendshme të të folurit.
“Kjo është thelbësore për segmentin tonë fillestar të klientëve sepse shumë prej tyre kanë humbur ose kanë funksion të dëmtuar të mushkërive,” thotë Vega.
Vega gjithashtu inkurajohet nga përparimi në agjentët e AI-së dhe pajisjet që funksionojnë me to. Pavarësisht se si evoluon bota digjitale, Vega beson se Augmental mund të jetë një mjet nga i cili mund të përfitojnë të gjithë.
“Ne besojmë se ky është sistemi më shprehës dhe më praktik pa përdorimin e duarve që njerëzit kanë krijuar ndonjëherë .”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
