Qyteti magjepsës që u shpall destinacioni më i përballueshëm veror në Europë

Nëse mendoni se për të shijuar pushime cilësore në Europë duhet të shpenzoni gjithë kursimet, mendohuni edhe njëherë. Kontinenti ynë është i mbushur me destinacione të nënvlerësuara që ofrojnë një pasuri kulturore të jashtëzakonshme dhe çmime të përballueshme.

Për t’u ardhur në ndihmë udhëtarëve që duan të qëndrojnë brenda buxhetit, ofruesi britanik i kartave të kreditit Aqua ka analizuar koston mesatare të udhëtimeve vajtje-ardhje, qëndrimeve njëjavore në hotel, ushqimit dhe pijeve, si dhe transportit lokal në disa qytete europiane. Në bazë të këtyre të dhënave, është përpiluar një listë me destinacionet më të përballueshme për pushimet e verës.

Në krye të listës u rendit Budapesti, kryeqyteti i Hungarisë, si qyteti më i lirë për udhëtarët nga Mbretëria e Bashkuar. Imagjinoni bileta avioni me një kosto mesatare prej vetëm 83 £ për person, qëndrime njëjavore në hotel për rreth 536 £ për dy persona, vakte për rreth 8.28 £ dhe një gotë birrë me çmim mesatar 2.07 £. Edhe transporti lokal është shumë ekonomik,  biletat kushtojnë më pak se 1 £. Me gjithë këtë kursim, do të ndiheni si mbretër ndërsa shëtisni përgjatë lumit Danub me pamje nga Kalaja e Budës dhe ndërtesa madhështore e Parlamentit.

Lexo edhe:Qyteti futuristik me më shumë qiellgërvishtës në botë

Me buxhet të lirë dhe përvoja kaq të pasura, nuk ka justifikim për të mos shijuar edhe banjat termale të famshme të qytetit. Një prej tyre, Rudas Baths, ndodhet pranë lumit dhe daton që nga periudha otomane, mbi 500 vjet më parë. Ky kompleks ofron pishina, sauna, banja turke, vaskë të ftohtë dhe shumë më tepër. Me një tarifë të përballueshme, mund të shtoni edhe një masazh relaksues apo një darkë të këndshme në tarracë, duke soditur Danubin dhe anijet që lundrojnë ngadalë mbi të.

Dhe nëse ju duhet një arsye më shumë për të planifikuar udhëtimin, këtë vit në Budapest do të hapet edhe Time Out Market, një hapësirë që sjell kuzhinën më të mirë të qytetit nën një çati,  dhe ja çfarë mund të prisni nga menuja.

Destinacionet më të përballueshme verore në Europë:

• Budapest, Hungari

• Pragë, Çeki

• Costa del Sol, Spanjë

• Porto, Portugali

• Lanzarote, Spanjë

• Lake District, Mbretëri e Bashkuar

• Madrid, Spanjë

• Blackpool, Mbretëri e Bashkuar

• Tenerife, Spanjë

• Forest of Dean, Mbretëri e Bashkuar

timeout