Po, në mes të Beogradit ngrihet krenare një ndërtesë që mban emrin “Albania”. Për shumëkënd mund të tingëllojë si paradoks, por kjo është një nga historitë më interesante të fqinjësisë ballkanike, qiellgërvishtësja e parë në Beograd, ndërtuar në vitin 1939, quhet “Pallati Albania” dhe sot, një pjesë e saj është në shitje për 3.88 milionë euro.
Në zemër të kryeqytetit serb, aty ku përplasen historia dhe moderniteti, ndodhet ky simbol që mban një emër krejt shqiptar. Me 13 kate dhe pamje mbresëlënëse, “Pallati Albania” për dekada ishte ndërtesa më e lartë e qytetit dhe një prej më të lartave në Evropën Juglindore.
Por pas emrit fshihet një histori që prek rrënjët e identitetit. Në të njëjtin vend, rreth vitit 1840, ekzistonte një lokal i vogël, “Café Albania”, në pronësi të një burri të quajtur Mihailo “Albanez”, një serb me origjinë nga Shqipëria. Ai e quajti kafenenë sipas vendlindjes së tij, një gjest i thjeshtë që më vonë do të lënte një gjurmë të përhershme në zemrën e Beogradit.
Sot, kjo godinë historike është shpallur pasuri kulturore dhe ndodhet në proces falimentimi nga Banka e Beogradit. 381 metra katrorë të saj janë ofruar për shitje, nën mbikëqyrjen e Agjencisë për Sigurimin e Depozitave. Ligji kërkon që para se të kalojë në duart e blerësve privatë, shteti serb të ketë të drejtën e parë të ofertës.
Në një Beograd që ndërton çdo ditë qiellgërvishtës të reja, “Pallati Albania” mbetet një monument që flet për një histori të përbashkët, përtej kufijve dhe politikave. Një pjesë e Shqipërisë, në mes të Beogradit. Një kujtim që nuk mund të fshihet as nga koha, as nga tregu.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
