200 praktikantë në vit do të punësohen në institucionet shtetërore. Vendimi është marrë së fundi nga Këshilli i Ministrave.
Ky vendim parashikon që, “Ministria përgjegjëse për rininë dërgon në ministrinë përgjegjëse për financat numrin e praktikantëve që do të punësohen në çdo institucion të administratës shtetërore, në kuadër të programit kombëtar të praktikave të punës për çdo vit buxhetor. Ministria përgjegjëse për financat njofton degët e thesarit për numrin e praktikantëve që do të paguhen brenda fondeve të miratuara për institucionin përkatës në ligjin vjetor të buxhetit”.
Sipas vendimit, procesi i punësimit të praktikantëve në thirrjet e radhës, bëhet sipas kërkesave të institucioneve të administratës shtetërore.
Ndarja e punësimeve deri në 200 praktikantë në çdo vit buxhetor, bazohet në kërkesat e institucioneve për punësimin e praktikantëve për 1 (një) vit kalendarik dhe numrin e praktikantëve që kanë kryer me sukses programin kombëtar të praktikave të punës.
Të punësuarit do të trajtohen me pagë deri në nivelin IV-b.
Praktikat e punës po marrin një vëmendje të veçantë së fundi në institucionet publike dhe private. Prej vitesh tregu i punës vuan nga një hendek i madh mes formimit dhe fuqisë punëtore të specializuar.
Deri më të tani, të rinjtë në universitete kanë zhvilluar praktika pune në institucione, por nuk ka pasur një politikë të shprehur qartësisht si me vendimin e fundit, për punësimin e tyre në institucionet publike.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
