Është e natyrshme që prindërit të duan të jenë të përsosur kur bëhet fjalë për rritjen e fëmijëve, por sipas ekspertëve, gabimet janë pjesë e pandashme e këtij procesi. Në fakt, janë thelbësore për rritjen e fëmijëve të suksesshëm, thotë psikologia zhvillimore Aliza Pressman në një episod të podcast-it “The Mel Robbins Podcast”. Kur fëmijët shohin prindërit duke gabuar, ata mësojnë se dështimi nuk do të thotë se ka diçka të gabuar me ta, duke ulur kështu presionin për të qenë pa gabime.
“Po të mos shihnin gabimet tona, fëmijët nuk do të kishin shumë shpresë se mund të gabojnë, të rriten dhe prapë të ndihen të dashur dhe të vlefshëm,” thekson Pressman.
Gabimet janë të pashmangshme
Sipas saj, gabimet prindërore janë të pashmangshme, nga harrimi i një ushqimi të preferuar për fëmijën, deri tek një fjalë e papërshtatshme e thënë rastësisht. “Ne lindim si prindër në momentin kur lindin fëmijët tanë,” shton Pressman. “Është e qartë se do të gabojmë vazhdimisht, sepse jemi prindër ‘bebë’. Është pjesë e domosdoshme e këtij roli.” Ajo thekson se më e rëndësishme se vetë gabimi është mënyra se si prindërit reagojnë ndaj tij. Një praktikë thelbësore është “riparimi”, pra të kërkuarit falje direkt fëmijës. Psikologë të tjerë ndajnë të njëjtin mendim: të jesh i sinqertë dhe i drejtpërdrejtë. Psikologia e fëmijëve Tovah Klein, drejtoreshë e Qendrës për Zhvillimin e Fëmijërisë së Hershme në Barnard College, rekomandon fraza të thjeshta si: “Më vjen keq që bërtita” ose “Të kërkoj ndjesë, nuk duhej ta bëja këtë.” Kjo i ndihmon fëmijët të mos e keqinterpretojnë një shpërthim emocional si diçka më të rëndë ose afatgjatë.
Lexo edhe: Shefi i Microsoft i shqetësuar nga rritja e rasteve të “psikozës nga AI”
Ekspertët theksojnë gjithashtu rëndësinë e modelimit të sjelljes së duhur. “Nëse doni që fëmijët të mos jenë të varur nga ekranet, mos rrini gjithë kohën me telefon në dorë para tyre. Nëse doni të jenë aktivë, tregojuni me shembull duke u ushtruar,” shkruan Theo Wolf, edukator dhe trajner në Spike Lab, një program sipërmarrjeje për adoleshentët me bazë në Nju Jork. Fëmijët mësojnë nga çdo sjellje e prindërve, nga qëndrueshmëria mendore e deri tek vetëdija për veten, por edhe nga gjërat e vogla të përditshmërisë dhe mënyra se si flasim kur mendojmë se ata nuk po dëgjojnë. “Jini të vetëdijshëm për shembullin që po jepni,” thekson Wolf. “Nëse doni që fëmijët të rriten të përgjegjshëm, me qëllim, punëtorë dhe mbi të gjitha të lumtur, mishëroni vetë këto cilësi.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
