Pse profesionistët e suksesshëm harrojnë gëzimin (dhe si ta gjejnë sërish)

Studimet tregojnë se për të pasur një jetë të kënaqshme, njeriu ka nevojë të përjetojë rregullisht tre gjëra: arritje (një ndjenjë suksesi ose vlerësimi), kuptim (lidhje me diçka më të madhe se vetja) dhe gëzim (emocione pozitive dhe lumturi në moment). Shumë profesionistë ambiciozë arrijnë mirë dy të parat, por shpesh dështojnë tek e treta. Gëzimi mbetet i rrallë, i shkurtër dhe shpesh i nënvlerësuar.

Pse mungon gëzimi?

Një arsye kryesore është koha. Një studim mbi 1,500 profesionistë të diplomuar nga Harvard zbuloi se ata kalojnë mesatarisht 50 orë në javë në punë dhe 12 orë në detyra të tjera jashtë saj. Pas gjumit, ngrënies dhe udhëtimit, mbeten vetëm rreth 26 orë në javë, pra vetëm 3 orë në ditë, për aktivitete të lira. Megjithatë, çështja nuk është vetëm sa kohë ke, por si e përdor atë. Shumë njerëz e shpërdorojnë kohën e lirë ose e shpenzojnë në mënyrë joefektive, duke mos e kthyer atë në burim të gëzimit.

Lexo edhe:15 shtetet me buxhetet më të mëdha ushtarake në 2025

Pesë strategji për të gjetur më shumë gëzim

1. Lidhu me të tjerët
   Marrëdhëniet e forta dhe të shëndetshme janë parashikuesi më i fuqishëm i lumturisë. Shumë aktivitete, edhe ato të thjeshtat, sjellin më shumë gëzim kur ndahen me familjen ose miqtë. Pavarësisht lodhjes që mund të sjellë organizimi, përfitimet emocionale janë më të mëdha sesa kostoja.

2. Shmang aktivitetet pasive
   Shumë njerëz zgjedhin të pushojnë para televizorit ose në rrjetet sociale, por studimet tregojnë se këto nuk sjellin kënaqësi afatgjatë. Aktivitetet aktive – si sporti, një hobi, apo vullnetarizmi, rrisin ndjeshëm gjendjen shpirtërore dhe kënaqësinë me jetën.

3. Ndiq pasionin tënd
   Gëzimi rritet kur bëjmë atë që na pëlqen vërtet, jo atë që “duhet” të bëjmë sipas të tjerëve. Mund të jetë një hobi i vogël, rregullimi i hapësirës personale, gatimi apo diçka kreative, rëndësi ka të lidhet me atë që të sjell kënaqësi të sinqertë.

4. Diversifiko aktivitetet
   Të fokusohesh vetëm në një aktivitet mund ta humbasë shpejt magjinë. Studimet tregojnë se varieteti është çelësi i lumturisë, sepse parandalon monotoninë dhe e bën kohën e lirë më stimuluese.

5. Mbro kohën tënde të lirë
   Kufijtë midis punës dhe kohës personale janë thelbësorë. Çdo orë e lirë që i shtohet punës, zvogëlon ndjeshëm gëzimin. Por çdo orë që i kushtohet aktiviteteve të këndshme, rrit ndjeshëm lumturinë dhe madje e bën punën më produktive.

Njerëzit shpesh i kushtojnë vëmendje arritjes dhe kuptimit, duke lënë mënjanë gëzimin. Por tre shtyllat janë të pandashme: vetëm kur përjetojmë arritje, kuptim dhe gëzim, ndjehemi plotësisht të kënaqur. Për të ndërtuar një jetë më të balancuar, duhet të mësojmë të përdorim me mençuri kohën tonë të lirë, duke e mbrojtur atë dhe duke e mbushur me aktivitete që na japin energji, lumturi dhe një ndjenjë të vërtetë të jetesës.

HBR