Në fund të majit, drejtori ekzekutiv i Anthropic, Dario Amodei, hapi publikisht një debat të ndjeshëm, duke paralajmëruar se gjysma e vendeve të punës në nivel fillestar mund të zhduken brenda pesë viteve për shkak të inteligjencës artificiale, duke e çuar papunësinë në SHBA deri në 20%. Por Amodei nuk është aspak i vetëm në këto parashikime të zymta për të ardhmen e punës. Një artikull i ri i Wall Street Journal nxjerr në pah se të tjerë drejtues të mëdhenj korporatash po bëjnë deklarata gjithnjë e më dramatike, duke e kthyer panikun për vendet e punës në një lojë gare të re mes drejtuesve ekzekutivë.
Disa nga këto deklarata paraprinë paralajmërimin e Amodei-t. Për shembull, në ditën vjetore për investitorët të JPMorgan në fillim të majit, drejtoresha e bankës për sektorin e konsumatorëve, Marianne Lake, parashikoi se AI do të “mundësojë” një reduktim me 10% të fuqisë punëtore. Por nga ai moment, deklaratat kanë ardhur gjithnjë e më të shpeshta dhe më të ashpra. Në një shënim muajin e kaluar, drejtori ekzekutiv i Amazon, Andy Jassy, paralajmëroi punonjësit që të presin një staf më të vogël, si rezultat i “ndryshimit teknologjik që ndodh vetëm një herë në jetë.”
Lexo edhe: A do ta “vrasë” AI industrinë e librave komikë?
CEO i ThredUp tha në një konferencë muajin e kaluar se AI do të shkatërrojë “shumë më tepër vende pune nga sa imagjinon njeriu mesatar.” Por deklarata më tronditëse deri më tani erdhi nga drejtori ekzekutiv i Ford-it, Jim Farley, i cili javën e kaluar deklaroi se AI do të “zëvendësojë në mënyrë të drejtpërdrejtë gjysmën e punonjësve me kollare të bardha në SHBA.”
Kjo përbën një ndryshim të fortë nga qëndrimi më i kujdesshëm që kishin mbajtur më parë drejtuesit për ndikimin e AI në punësim, vëren Wall Street Journal. Disa udhëheqës teknologjie, përfshirë edhe nga kompanitë më të fuqishme të AI-së kanë propozuar më parë se frika është e ekzagjeruar, por rritja e paralajmërimeve të drejtpërdrejta nga brenda industrisë sugjeron se ristrukturime masive po afrohen, pavarësisht nëse shoqëria është e përgatitur për to apo jo.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
