Universitetet po kthehen te një metodë “old school” për të luftuar një problem shumë modern: kopjimin me Inteligjencë Artificiale. Në SHBA, profesorë në institucione si University of Wyoming, Vanderbilt University dhe UC San Diego kanë nisur të rikthejnë provimet orale, si një mënyrë për të testuar realisht njohuritë e studentëve, pa ndërmjetësimin e mjeteve si ChatGPT.
Në vend të eseve online apo detyrave të marra në shtëpi, studentët ulen ballë për ballë me pedagogun për një kohë të caktuar dhe duhet të shpjegojnë idetë, konceptet dhe arsyetimet e tyre në kohë reale. Një format që, sipas pedagogëve, është pothuajse i pamundur të falsifikohet nga teknologjia.
Pse po ndodh ky ndryshim?
Rritja e shpejtë e përdorimit të AI në arsim ka vënë në vështirësi format tradicionale të vlerësimit. Programet për zbulimin e teksteve të shkruara nga AI po rezultojnë gjithnjë e më pak efektive, ndërsa detyrat online dhe provimet “take-home” janë kthyer në terren të favorshëm për abuzim.
Si pasojë, profesorët po zhvendosin fokusin nga “policimi i teknologjisë” te testimi i kuptimit real. Provimet orale, thonë ata, zbulojnë menjëherë nëse studenti e zotëron lëndën apo thjesht di të përdorë një mjet digjital.
Çfarë thonë studentët?
Edhe pse më stresuese për disa, shumë studentë pranojnë se provimet me gojë i ndihmojnë të mësojnë më thellë dhe të kuptojnë realisht materialin. “Nuk mund të fshihesh pas një ekrani. O e di, o nuk e di,” shprehen disa prej tyre.
Një rikthim më i gjerë te format tradicionale
Provimet orale nuk janë e vetmja zgjidhje. Disa universitete po rikthejnë edhe provimet me shkrim në klasë, me stilolaps dhe fletë, të njohura si “blue books”. Qëllimi është i qartë: të krijohen forma vlerësimi që janë më pak të cenueshme nga përdorimi i AI.
Sfida dhe dilema
Megjithatë, kjo metodë nuk është pa probleme. Provimet orale kërkojnë më shumë kohë, janë të vështira për klasa të mëdha dhe mund të penalizojnë studentët që nuk shprehen mirë verbalisht, por janë të fortë në shkrim. Për këtë arsye, shumë institucione po eksperimentojnë me kombinime vlerësimi: projekte, prezantime, ese të kontrolluara dhe diskutime live.
Një kthesë në arsim
Ekspertët e arsimit e shohin këtë si një moment reflektimi, në vend që universitetet të luftojnë teknologjinë, ato po rishikojnë mënyrën se si matin dijen. Mes AI-së që avancon dhe nevojës për mendim kritik, provimi me gojë po rikthehet si provë e dijes së vërtetë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
