Qeveria britanike po përgatitet të ndërmarrë masa të ashpra ndaj platformës X (ish-Twitter), në pronësi të Elon Musk, për shkak të prodhimit masiv të imazheve të manipuluara dhe të seksualizuara të grave dhe fëmijëve përmes mjetit të saj të inteligjencës artificiale, Grok.
Sekretari britanik i Biznesit, Peter Kyle, deklaroi se X “nuk po bën mjaftueshëm për të mbrojtur përdoruesit e saj online” dhe se qeveria do të mbështesë plotësisht çdo veprim që ndërmerr autoriteti rregullator i medias, Ofcom, përfshirë edhe mundësinë ekstreme të bllokimit të platformës në Mbretërinë e Bashkuar.
Hetim i përshpejtuar ndaj Grok
Ofcom ka nisur një hetim të përshpejtuar ndaj X, pasi ka marrë informacionet e kërkuara nga kompania lidhur me përdorimin e Grok për krijimin e imazheve të manipuluara të njerëzve, shpesh të paraqitur në poza të seksualizuara ose me veshje minimale. Sekretarja e Teknologjisë, Liz Kendall, pritet të informojë Parlamentin britanik të hënën për hapat që do të ndërmerren, ndërsa ka deklaruar se pret masa konkrete nga Ofcom brenda pak ditësh.
Në një intervistë për Sky News, Kyle u shpreh prerazi: “Dua të jem shumë i qartë: X nuk po i mbron mjaftueshëm përdoruesit e saj online.” Ndërsa në BBC Breakfast ai e quajti situatën “të tmerrshme”, duke përmendur një rast personal: “Takova një grua hebreje, e cila kishte gjetur një imazh të vetin, të gjeneruar nga AI, në bikini jashtë Auschwitz-it. Ishte diçka që të sëmur shpirtërisht.” Sipas tij, lëshimi i teknologjive të tilla pa testime dhe pa vlerësim të ndikimit në shoqëri është “jashtëzakonisht i rrezikshëm”. Ofcom ka kompetenca të gjera nën Ligjin për Sigurinë Online (Online Safety Act), që nga gjoba shumë milionëshe deri te kërkesa për një urdhër gjykate për bllokimin e plotë të një platforme në territorin britanik.
Kyle deklaroi: “Ofcom ka fuqinë të vendosë gjoba të rënda ose edhe ta ndalojë X në Britani, nëse e sheh të nevojshme. Qeveria dhe Liz Kendall e mbështesin plotësisht këtë autoritet.” Një vendim i tillë do të shkaktonte reagime të forta nga Elon Musk dhe administrata e Donald Trump në SHBA. Musk, i njohur për publikime radikale dhe nacionaliste, ka akuzuar më herët qeverinë e Keir Starmer për censurë dhe ka nxitur britanikët të “rebelohen”. Një zyrtare e administratës Trump, Sarah Rogers, e krahasoi një ndalim të mundshëm të X në Britani me censurën në Rusi, duke e quajtur atë “një ndalim në stilin e Putinit”.
Të premten, X njoftoi se funksioni për gjenerimin dhe redaktimin e imazheve do të kufizohet vetëm për përdoruesit me pagesë. Por zyra e kryeministrit britanik e cilësoi këtë si të papranueshme, duke deklaruar se: “Kjo thjesht e kthen një mjet që prodhon përmbajtje të paligjshme në një shërbim premium.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
