Ministria e Mbrojtjes ka bërë të ditur se situata e zjarreve në vend vijon në disa zona, në jug dhe në veri të vendit. Efektivë të Forcave të Armatosura, zjarrfikës, punonjës të emergjencave civile e shërbimeve vendore po punojnë për shuarjen e flakëve në zona të ndryshme.
Sipas ministrisë, vijon të jetë aktive vatra e zjarrit në fshatin Dukat i Ri, në Gadishullin e Karaburunit dhe rreziku që po shfaqet është ai i përhapjes së këtyre flakëve në drejtim të Parkut Kombëtar të Llogarasë.
Operacioni nga ajri ka nisur në orët e para të mëngjesit. Ndërsa vatër tjetër kritike është ajo e Majës së Rrunës, mbi tunelin e Kalimashit. Aty po punohet për mbajtjen nën kontroll, në mënyrë që flakët të mos kërcënojnë banesat.
Lexo: 6 vatra aktive zjarri në vend. Dëme edhe në njerëz
Në fshatin Thirrë në Fan të Mirditës zjarri nuk paraqet rrezik për banesa, ndërsa po vijon puna për shuarjen e tij. Zjarri në fshatin Munellë-Domgjon është izoluar në njërin krah, por po vijon puna në krahun tjetër, ku ende ka prani flakësh.
Situatë të vështirë zjarri ka pasur në fshatin Patalej, njësia administrative Kolsh, bashkia Mirditë. Në fshatin Bogë, në Shkrel është aktivizuar një vatër zjarri një ditë më parë, por pa rrezik për banesat.
Një tjetër vatër zjarri është njoftuar në Parkun e Tomorrit në lartësinë mbi 1500 m. Në fshatin Corrush në Mallakastër janë izoluar dy vatra dhe po punohet për izolimin e flakëve në tre vatra të tjera aktive, të cilat janë në terren të vështirë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
