Ndërsa pagesat digjitale po rriten me ritme të shpejta në Europë, paraja cash mbetet ende mjeti kryesor i pagesës në mbi gjysmën e transaksioneve. Sipas një sondazhi të Bankës Qendrore Evropiane (BQE) me 40,000 pjesëmarrës, 52% e pagesave në eurozonë në vitin 2024 u kryen me para në dorë, megjithëse pjesa e tyre në vlerë monetare është dukshëm më e ulët – vetëm 39%.
Në 14 nga 20 vendet e eurozonës, paraja fizike është mënyra më e përdorur e pagesës, duke përbërë midis 45% dhe 55% të transaksioneve në gjysmën e tyre.
Përdorimi varion nga 22% në Holandë deri në 67% në Maltë.
Europa Jugore dhe Lindore mbeten më të varura nga paratë fizike: Italia (61%), Spanja (57%) dhe Sllovenia (64%) kryesojnë në përdorimin e tyre.
Në të kundërt, vendet e Europës Veriore dhe Perëndimore si Holanda (22%), Finlanda (27%), Luksemburgu (37%), Belgjika (39%) dhe Franca (43%) po i afrohen një ekonomie pothuajse pa para fizike.
Ndër katër ekonomitë më të mëdha të BE-së, Franca është e vetmja nën mesataren e eurozonës (52%), ndërsa Gjermania qëndron pak mbi të, me 53%.
Një zëdhënës i Bankës Qendrore të Holandës i tha Euronews Business se “pagesat pa kontakt përmes kartës apo telefonit inteligjent perceptohen si më të shpejta dhe më të përshtatshme se përdorimi i parave në dorë”.
Lexo edhe: Future2Tech 2025, mbi 5000 vizitorë dhe mbështetje për startup-et dhe bizneset
Në terma vlere, përdorimi i parasë së gatshme arrin në 39% të pagesave në eurozonë, duke u ulur në 17% në Holandë dhe duke u rritur në 59% në Lituani. Përdorim i lartë i parasë, mbi 50% të shpenzimeve totale, regjistrohet në Lituani, Sllovaki, Slloveni, Austri, Maltë dhe Kroaci.
Në anën tjetër, vendet me varësi më të ulët përfshijnë Holandën (17%), Finlandën (28%), Luksemburgun (29%), Gjermaninë (30%), Francën (34%) dhe Belgjikën (35%).
Ndërkohë, në Gjermani, përdorimi i parasë po bie, ndryshe nga Austria, ku bankënotat vijojnë të mbeten të preferuara.
Rezultatet tregojnë një ndarje të qartë: Europa Qendrore, Jugore dhe Lindore vazhdon të mbështetet fort në para fizike, ndërsa Veriu dhe Perëndimi po udhëheqin kalimin drejt pagesave dixhitale.
BQE vëren gjithashtu se paraja është mjeti kryesor për blerje me vlerë të vogël, ndërsa kartat dominojnë pagesat mbi 50 euro.
Arsyet që qytetarët japin për përdorimin e parasë përfshijnë: anonimitetin dhe mbrojtjen e privatësisë (41%), vetëdijen më të madhe për shpenzimet (35%), dhe përfundimin e menjëhershëm të transaksioneve (30%).
Vetëm 18% e të anketuarve e konsiderojnë paranë më të sigurt se format dixhitale të pagesës.
Të rinjtë nën 40 vjeç preferojnë më shumë pagesat dixhitale, ndërsa personat mbi 65 vjeç kryejnë 57% të pagesave me para fizike.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
