Organizata Botërore e Shëndetësisë (OBSH) thotë se numri i rasteve të infektimit me koronavirus ka rënë në mënyrë dramatike në botë, prandaj të gjitha shtetet duhet që të shfrytëzojnë këtë mundësi sipas OBSH, për t’i dhënë fund pandemisë.
Numri i rasteve të reja me koronavirus, i cili ka lënë të vdekur miliona njerëz prej fundit të vitit 2019, ka rënë në nivelet më të ulëta prej marsit të vitit 2020, ka thënë shefi i OBSH-së, Tedros Adhanom Ghebreyesus.
“Nuk kemi qenë kurrë në pozitë më të mirë për t’i dhënë fund pandemisë. Nuk e kemi arritur ende këtë gjë, por fundi po shihet. Një vrapues maratone nuk ndalet kur sheh se i është afruar fundit. Përkundrazi, ai vrapon edhe më shumë, me gjithë energjinë që i ka mbetur. Ashtu duhet të veprojmë edhe ne. Jemi në pozicion fitues. Tani është koha më e keqe për të ndalur vrapin”, ka paralajmëruar ai.
Nëse nuk veprojmë tani, tha ai, rrezikojmë të përballemi me më shumë variante, më shumë vdekje, dhe me më shumë paqartësi. Organizata Botërore e Shëndetësisë e pati shpallur koronavirusin si pandemi më 11 mars të vitit 2020.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
